تحریر :شہباز خان

تاریخ گواہ ہے کہ جب بھی پاکستان پر حملہ ہوا، اس قوم نے نہ صرف سینہ سپر ہو کر دشمن کا مقابلہ کیا بلکہ دشمن کو ایسی چوٹ دی کہ وہ مدتوں یاد رکھے۔ مئی 2025 میں ہونے والی پانچ روزہ فضائی جنگ نے یہ ثابت کر دیا کہ صرف جدید اسلحہ یا مہنگے جنگی جہاز ہی کامیابی کی ضمانت نہیں ہوتے، بلکہ اصل طاقت جذبے، حکمتِ عملی، اور قومی اتحاد میں ہوتی ہے۔ اور ان تمام صفات کا عملی مظاہرہ ایک بار پھر پاک فضائیہ نے کر کے دکھایا۔
جنگ کھیڈ نئیں ہوندی زنانیاں دی۔ایک بار پھر قوم کی آواز
ڈاکٹر رشید انور کے انقلابی ترانے "جنگ کھیڈ نئیں ہوندی زنانیاں دی" نے 60 برس بعد ایک بار پھر پاکستانی فضاؤں میں گونج کر قومی شعور کو بیدار کیا۔ یہ صرف ایک ترانہ نہیں، بلکہ پاکستانی قوم کی غیرت، دلیری اور بے مثال قربانیوں کی روحانی ترجمانی ہے۔ جب دشمن نے فضا میں حملہ کیا، یہی نغمہ پاک فضائیہ کے جوانوں کے دل میں دھڑک رہا تھا۔
فضا میں پہلی ضرب — بھارت کی حیرانی، دنیا کی توجہ
بھارت نے 6 مئی کی شب، سینکڑوں جہازوں کے ذریعے پاکستان کی فضائی حدود کی خلاف ورزی کی جس کا مقصد اچانک حملہ کر کے پاکستان کو دفاعی پوزیشن پر لانا تھا۔ مگر بھارت یہ بھول گیا تھا کہ پاکستان کی فضائیہ 2025 کی نہیں، بلکہ آنے والے وقتوں کی تیار فوج ہے۔
پاکستان نے 35 سے 40 JF-17 تھنڈر طیارے فوری طور پر فضا میں بلند کیے اور دشمن کے طیاروں کو پاکستانی حدود میں داخل ہونے سے قبل ہی واپس دھکیل دیا۔ تین رافیل طیارے مار گرائے گئے، جن پر بھارت کو غیر معمولی فخر تھا۔ یہ وہ لمحہ تھا جب دنیا نے دیکھا کہ ’’فضا کا بادشاہ‘‘ کون ہے۔
ڈیجیٹل وار ۔ خاموش محاذ پر بڑی فتح
جنگ صرف گولی اور بم سے نہیں جیتی جاتی، اب میدان سائبر اسپیس کا بھی ہے۔ پاکستان نے نہ صرف بھارتی طیاروں کو نشانہ بنایا، بلکہ اس کا مکمل فضائی کمانڈ سسٹم ہیک کر کے بھارت کو اندھا کر دیا۔ بھارت کی فضائیہ افراتفری اور کنفیوژن کا شکار ہو گئی۔ سسٹمز ناکام، راڈار جام، اور کمیونیکیشن منقطع ۔ بھارت کیلئے یہ ایک نیا میدانِ شکست تھا۔
چین کی دوستی: باتوں سے نکل کر عملی مدد تک
یہ جنگ پاکستان اور چین کی اس دوستی کا عملی ثبوت بن گئی جسے ’’ہمالیہ سے بلند اور سمندر سے گہری‘‘ کہا جاتا ہے۔ چین نے پاکستان کو نہ صرف JF-17 تیار کرنے میں مدد دی، بلکہ اس بار جدید J-35 اسٹیلتھ طیارے بھی فراہم کیے۔ یہ وہ ٹیکنالوجی ہے جو صرف امریکہ اور چین کے پاس تھی۔کہا جا رہا ہے کہ چین نے امریکہ کی مخالفت کے باوجود یہ طیارے پاکستان کو فراہم کیے۔ اس سے پاکستان نے فضا میں برتری حاصل کی اور بھارت کا خواب چکنا چور کر دیا۔
بھارت کی غلط فہمی، مودی کی سیاسی جوا بازی
نریندر مودی نے سوچا تھا کہ پہلگام واقعے کو جواز بنا کر پاکستان پر حملہ کرے گا اور انتخابات میں عوامی حمایت حاصل کرے گا۔ مگر جنگ کے نتائج برعکس نکلے۔ راہول گاندھی نے بھارتی پارلیمنٹ میں مودی کو آڑے ہاتھوں لیتے ہوئے کہا کہ "مودی کا سب سے بڑا جرم پاکستان اور چین کو ایک ساتھ لاکھڑا کرنا ہے"۔
امریکی مداخلت اور عالمی ردعمل
جنگ جیسے ہی شدت اختیار کر گئی، امریکہ فوری طور پر متحرک ہوا۔ صدر ڈونلڈ ٹرمپ نے دونوں ممالک کو متنبہ کیا کہ اگر لڑائی بند نہ کی گئی تو امریکہ تجارتی تعلقات منقطع کر دے گا۔ اس دھمکی اور پاک فضائیہ کی فیصلہ کن کارروائی کے بعد بھارت سیز فائر پر مجبور ہو گیا۔
امریکی صدر نے بعد ازاں اپنے سعودی عرب کے دورے کے دوران فخر سے کہا:
مجھے خوشی ہے کہ میں نے ایک بڑی جنگ کو روکا۔ پاکستان اور بھارت نے ہوش مندی کا مظاہرہ کیا۔
پاک فوج کا حوصلہ، قوم کا اعتماد
جنرل عاصم منیر کی قیادت میں "آپریشن بنیان مرصوص" پاکستان کی عسکری تاریخ میں ایک سنہرا باب ہے۔ ایک طرف دشمن کے طیارے گرائے گئے، دوسری طرف پاکستان نے 28 سے زائد بھارتی اہداف کو نشانہ بنایا۔ اس کامیابی نے پاکستان کی سیاسی قیادت کو بھی استحکام دیا اور عوام کے دلوں میں فوج کے لیے اعتماد میں اضافہ ہوا۔
نتیجہ: فضا کا بادشاہ وہی، جو دشمن کے غرور کو توڑ دے
پاکستان نے اس جنگ میں دشمن کو بتایا کہ ہم صرف دفاع کرنے والی قوم نہیں، بلکہ پیش قدمی، منصوبہ بندی اور جدید ٹیکنالوجی کے ساتھ دشمن کے ہر وار کو ناکام بنانے کی مکمل صلاحیت رکھتے ہیں۔ پاک فضائیہ نے ثابت کر دیا کہ فضا پر راج وہی کرتا ہے جس کے دل میں جذبۂ شہادت، ہاتھ میں مہارت، اور پیچھے قوم کی دعائیں ہوں۔