تحریر: شہباز خان

نیا بدل چکی ہے۔ اب صرف توپ، ٹینک اور میزائلوں سے جنگیں نہیں لڑی جاتیں۔ اب جنگیں الفاظ سے، میڈیا سے اور بیانیے سے بھی لڑی جاتی ہیں۔ جدید دنیا میں معلومات ایک ہتھیار بن چکی ہیں، اور بیانیہ وہ محاذ ہے جہاں قومیں اپنی ساکھ، وقار اور فتح کا مقدمہ لڑتی ہیں۔ خوش آئند امر یہ ہے کہ حالیہ پاک-بھارت کشیدگی میں پاکستان نے صرف دفاعی میدان میں نہیں بلکہ میڈیا اور بیانیے کی جنگ میں بھی بھرپور کامیابی حاصل کی۔
جب بھارت نے ایک بار پھر پاکستان پر الزامات اور حملوں کا سلسلہ چھیڑا، تو اس بار پاکستان نے جوابی کارروائی صرف سرحدوں پر نہیں کی بلکہ عالمی میڈیا، سفارتی حلقوں اور ڈیجیٹل پلیٹ فارمز پر ایک مربوط، واضح اور مضبوط بیانیہ پیش کیا۔ اس بیانیے کی قیادت پاک فوج کے سربراہ جنرل عاصم منیر نے کی، جنہوں نے ایک جرات مندانہ خطاب میں نہ صرف قوم کا حوصلہ بلند کیا بلکہ دشمن کو بھی واضح پیغام دیا کہ پاکستان کسی صورت کمزور نہیں۔
متحد قیادت، مربوط پیغام
اس بار ایک منفرد پہلو یہ تھا کہ عسکری اور سول قیادت ایک صفحے پر نظر آئی۔ ڈی جی آئی ایس پی آر لیفٹیننٹ جنرل احمد شریف چوہدری نے وائس ایڈمرل راجہ رب نواز اور ایئر وائس مارشل اورنگزیب احمد کے ہمراہ بریفنگز دے کر یہ پیغام دیا کہ پاکستان کی تینوں افواج یکجہتی اور تیاری کے ساتھ دشمن کا سامنا کرنے کو تیار ہیں۔ ان بریفنگز میں محض عسکری معاملات پر روشنی نہیں ڈالی گئی بلکہ بیانیہ، نفسیاتی جنگ، اور عالمی برادری تک پاکستان کا مؤقف پہنچانے کی حکمت عملی بھی شامل تھی۔
عالمی میڈیا کی سطح پر کامیاب سفارتکاری
بیانیے کی اس جنگ میں ڈی جی آئی ایس پی آر نے عالمی میڈیا کو بروقت اور مؤثر انداز میں انٹرویوز دیے۔ سی این این، بی بی سی، الجزیرہ اور دیگر بڑے اداروں پر پاکستان کا مؤقف نہ صرف سنا گیا بلکہ اسے سنجیدگی سے لیا گیا۔ پاکستان نے فیک نیوز کے طوفان کا نہایت پیشہ ورانہ انداز میں مقابلہ کیا اور بھارت کی گمراہ کن اطلاعات کو ثبوتوں کے ساتھ رد کیا۔
ڈیجیٹل میڈیا اور قومی یکجہتی کا اظہار
جہاں فیک نیوز اور پروپیگنڈہ کی یلغار تھی، وہاں پاکستان کے ڈیجیٹل میڈیا ونگ نے سچائی کی روشنی پھیلائی۔ سوشل میڈیا پر افواج پاکستان، قومی مفادات اور قومی اتحاد کی بھرپور حمایت دیکھنے کو ملی۔ سیاسی وابستگیوں سے بالاتر ہو کر ہر پاکستانی نے اپنے انداز میں ملک کا دفاع کیا۔ یہ پہلا موقع تھا کہ قوم کا ہر فرد اس میڈیا وار کا سپاہی تھا۔
ایئر وائس مارشل اورنگزیب کی سوشل میڈیا پر موجودگی، افسران کی جاندار تقاریر، اور سچ پر مبنی معلوماتی مواد نے عوام کے دل جیت لیے۔ یہی وجہ ہے کہ جب جنرل عاصم منیر کرکٹ اسٹیڈیم پہنچے تو عوام نے والہانہ استقبال کیا۔ یہ سوشل میڈیا کی طاقت تھی جو عوامی شعور میں بدلا اور پھر اجتماعی ردعمل میں ڈھلا۔
اندرونی محاذ پر اتفاق اور برداشت
اس جنگ میں ایک اور خوش آئند بات یہ رہی کہ پاکستان کے عوام نے فرقہ واریت، لسانیت، اور سیاسی مخالفت کو ایک طرف رکھ کر یکجہتی کا مظاہرہ کیا۔ تمام سیاسی جماعتوں سے تعلق رکھنے والے افراد نے سوشل میڈیا پر پاک فوج اور قومی بیانیے کا دفاع کیا۔ اس اتحاد نے دشمن کے عزائم کو خاک میں ملا دیا۔
نتیجہ: ایک ناقابل شکست قوم کا پیغام
10 مئی 2025ء کو جنگ کے خاتمے کے ساتھ ہی دنیا نے تسلیم کیا کہ پاکستان صرف فوجی طاقت میں نہیں بلکہ بیانیے، سفارتکاری اور عوامی یکجہتی میں بھی ایک مضبوط ملک ہے۔ عالمی میڈیا نے پاکستان کے مؤقف اور حکمت عملی کو سراہا، اور بھارت کی کمزور سفارتی و معلوماتی پوزیشن کھل کر سامنے آ گئی۔
یہ جنگ صرف تین دنوں کی تھی مگر اس کی تیاری مہینوں پہلے کی گئی۔ پاکستان کے عسکری اور سفارتی حلقوں نے روایتی محاذ کے ساتھ ساتھ میڈیا وار کی شدت کو محسوس کیا اور ایک منظم حکمتِ عملی کے تحت ایسی حکمت، جرات اور دانشمندی کا مظاہرہ کیا کہ دشمن کے ایوانوں میں لرزہ طاری ہو گی۔