تحریر: شہباز خان

شیکسپیئر نے کہا تھا: ’’محبت اندھی ہوتی ہے‘‘، مگر تضادستان (یعنی پاکستان) کی سیاست میں یہ اندھی محبت ایک اندھا کنواں بن چکی ہے، جس میں سچ، عقل اور دلیل کی لاشیں روز گرتی ہیں۔یہ تحریر اسی المیے کا نوحہ ہے، جہاں "کپتان" یعنی عمران خان ایک سیاست دان سے بڑھ کر ایک اوتار بنا دیا گیا، اور اس کے حامی خود کو عاشقِ صادق سمجھتے ہوئے حقیقت، تدبر اور مصلحت کو خیانت قرار دینے لگے۔
اندھی محبت، اندھی سیاست
عشق میں جنون ہو تو وہ رومانوی ہو، مذہبی ہو یا سیاسی، انجام اکثر دردناک ہوتا ہے۔ علامہ اقبال نے تو عشق کو بے خطر آتش میں کودنے کا حوصلہ کہا تھا، مگر وہ عشق نظریہ، روحانیت اور حق کی بنیاد پر تھا۔ سیاست میں عشق، جب عقل کو برباد کر دے، تو وہ تباہی بن جاتا ہے۔عمران خان کے گرد پروان چڑھنے والی یہ اندھی عقیدت صرف ایک "لیڈر" سے محبت نہیں بلکہ ایک تصوراتی نجات دہندہ کی پرستش ہے۔ ان کے چاہنے والے انہیں زمین پر انسان نہیں، بلکہ مسیحا، مجاہد، اور حتیٰ کہ رسولوں جیسا کردار دیتے ہیں۔ ہر تنقید غداری، ہر مشورہ سازش، اور ہر اختلاف دشمنی ہے۔
میں جس سے پیار کرتا ہوں، اسے مار دیتا ہوں
کپتان کے سیاسی عاشق، جو درحقیقت ایک ہجوم ہیں، ایک ایسی جذباتی قوت بن چکے ہیں جو کسی سیاسی تدبیر یا حکمتِ عملی کو پنپنے ہی نہیں دیتے۔ خان کو سیاست سے زیادہ انقلاب، بیانیے اور مخالفت کا قیدی بنا دیا گیا ہے۔جیل کے اندر بیٹھے لیڈر نے وہ سنہری موقع ٹھکرا دیا جو نہ صرف قومی مفاہمت کی طرف لے جا سکتا تھا بلکہ خود انہیں دوبارہ اقتدار کے قریب کر سکتا تھا۔یہ عاشق "چوم چوم کر مارنے" والے ہیں۔ ان کے یوٹیوبی تجزیے، سوشل میڈیا کی تالیاں، اور ہر مفاہمانہ سوچ پر لعنت، درحقیقت عمران خان کو تنہا کر چکی ہے۔ وہ آج بھی اپنے ہی بیانیے کے اسیر ہیں، جسے بنانے والے اب اپنی جیبیں بھر چکے ہیں۔
سنہری موقع کا ضیاع
پاک بھارت کشیدگی کے موقع پر جہاں پوری قوم کو متحد ہونا چاہیے تھا، وہاں تحریک انصاف نے ایک انتہائی ناقابلِ فہم سیاسی خودکشی کی۔ آل پارٹیز کانفرنس میں شرکت نہ کرنا نہ صرف ایک وقتی سیاسی حماقت تھی بلکہ ایک قومی موقع کا قتل تھا۔اسی انکار نے خان کو جیل سے آزادی کا موقع نہ دیا، فوج کے ساتھ دوبارہ تعلق بحال نہ ہونے دیا، اور نہ ہی کسی قومی بیانیے میں ان کی شمولیت ممکن بنائی۔فوج نے سیاسی قیادت کی غیر موجودگی میں جنگ جیت کر، اپنی پوزیشن اور عوامی حمایت دونوں بحال کر لیں۔ جبکہ خان اور ان کے حامی صرف تماشائی رہ گئے۔
یوٹیوبرز، جذبات اور عمران خان کا اغوا
آج خان کی سیاست ان کی اپنی قیادت کے ہاتھ میں نہیں بلکہ چند یوٹیوبرز، ریٹائرڈ باغی، اور نرگسی عاشقوں کے ہاتھ میں ہے۔ یہ سب جانتے ہیں کہ مفاہمت اگر ہو گئی، خان نے اگر عقل کا راستہ اپنا لیا، تو ان کا کاروبار ختم ہو جائے گا۔یہ لوگ جان بوجھ کر اسے عقل کے مشورے سے دور رکھتے ہیں۔ اس لیے آج خان سیاست نہیں، بلکہ ایک یرغمال لیڈر بن چکا ہے۔
حل؟ عقل، مفاہمت، اور حقیقت پسندی
وقت کا تقاضا ہے کہ تحریک انصاف اپنے جذباتی ہجوم کے بجائے عقلی رہنماؤں پر بھروسا کرے۔ بیرسٹر گوہر علی اور ان جیسے رہنما جو مفاہمت، تدبر اور حقیقت پسندی کی بات کرتے ہیں، ان کی بات کو اہمیت دی جائے۔سیاست جذبات سے نہیں، فہم سے چلتی ہے۔ عقل کو رہنما بنایا جائے تو یہی بکھرا ہوا پاکستان ایک دن "اصل پاکستان" بن سکتا ہے۔نتیجہ:کپتان اور اس کے عاشق اس وقت ایک سیاسی المیے کا شکار ہیں، جس میں محبت کا اندھا پن، مخالفت کی شدت، اور حقیقت سے انکار سب شامل ہیں۔ جب تک سیاست کو عشق سے پاک نہیں کیا جاتا، اور سیاست دان کو اوتار نہیں بلکہ انسان مانا جائے، تب تک تضادستان اپنی کشمکش سے باہر نہیں نکل سکتا۔