تحریر: شہباز خان

خبریں ہیں کہ امریکا میں مقیم کچھ پاکستانی نژاد ڈاکٹرز اِن دنوں پاکستان آئے ہوئے ہیں۔ ان کا مقصد ایک بار پھر عمران خان اور اسٹیبلشمنٹ کے درمیان مفاہمت کی کوشش کرنا ہے۔ یہ ملاقاتیں کامیاب ہوتی ہیں یا نہیں، یہ وہ بنیادی سوال ہے جس پر تحریک انصاف کی آئندہ سیاست کا دار و مدار ہو سکتا ہے۔
یہ پہلا موقع نہیں۔ دو ماہ قبل بھی کچھ پاکستانی نژاد امریکی بزنس مین اور ڈاکٹرز پاکستان آئے تھے۔ اُنہوں نے نہ صرف اڈیالہ جیل میں عمران خان سے ملاقات کی بلکہ اسلام آباد کے ایک اہم سرکاری افسر سے بھی تبادلہ خیال کیا۔ مگر نتائج سامنے آنے سے قبل ہی تحریک انصاف کے بیرون ملک مقیم یوٹیوبرز اور پارٹی کے سوشل میڈیا ونگ نے انہی شخصیات کو نشانے پر لے لیا۔ انہیں شک کی نظر سے دیکھا گیا، ٹرول کیا گیا، حتیٰ کہ ان کی نیت تک پر سوالات اٹھائے گئے۔ اس رویے نے مفاہمت کی کوششوں کو شدید نقصان پہنچایا اور ایک بار پھر دروازے بند ہوتے دکھائی دیے۔
اب دوبارہ کچھ ایسے افراد پاکستان آ چکے ہیں۔ لیکن تاحال عمران خان یا کسی اہم سرکاری شخصیت سے ان کی ملاقات ممکن نہیں ہو سکی۔ پارٹی کے اندرونی ذرائع اس ہفتے کے دوران کسی پیش رفت کی اُمید کر رہے ہیں، مگر اصل سوال اپنی جگہ موجود ہے: کیا عمران خان گزشتہ دو تین سال کی محاذ آرائی پر مبنی سیاست ترک کرنے پر تیار ہیں؟
یہ وہی سیاست ہے جس کا ہدف مسلسل فوج، فوجی قیادت اور معیشت رہی۔ یہ رویہ نہ صرف عمران خان کے لیے مشکلات کا باعث بنا بلکہ تحریک انصاف کے سیاسی افق کو بھی دھندلا دیا۔ اب فیصلہ خان صاحب کے ہاتھ میں ہے کہ وہ ایک انقلابی کی حیثیت سے اداروں سے ٹکراؤ کا راستہ اپنائے رکھتے ہیں یا حقیقت پسندانہ انداز میں مفاہمت اور مکالمے کی راہ پر گامزن ہوتے ہیں۔
بات چیت اگر واقعی درکار ہے تو پھر اس کے تقاضے نبھانا ہوں گے۔ محض خواہش کافی نہیں، رویہ بھی بدلنا ہوگا۔ عمران خان کو نہ صرف اپنے لب و لہجے میں اعتدال لانا ہوگا بلکہ اپنے سوشل میڈیا نیٹ ورک، بیرون ملک مقیم حمایتیوں اور یوٹیوبرز کو بھی سخت پیغام دینا ہوگا کہ نفرت، بہتان اور ٹرولنگ کی سیاست ترک کی جائے۔ فوج سے بات چیت کی خواہش اور اُسی کے خلاف محاذ آرائی ایک ساتھ نہیں چل سکتی۔
حالیہ پاک-بھارت کشیدگی کے پس منظر میں، اور اس میں پاکستان کی سفارتی و دفاعی کامیابی کے بعد، تحریک انصاف کے لیے سیاسی آپشنز پہلے ہی محدود ہو چکے ہیں۔ امریکا سے آئے ہوئے ان افراد کی مفاہمتی کوشش یقیناً ایک مثبت قدم ہے، مگر یہ اُس وقت تک نتیجہ خیز نہیں ہو سکتی جب تک عمران خان خود سنجیدہ فیصلہ نہ کریں۔
تحریک انصاف کے دیگر رہنماؤں کی بھی ذمہ داری ہے کہ وہ صرف خان صاحب سے اتفاق نہ کریں بلکہ انہیں وہی بات کھل کر بتائیں جو وہ نجی مجالس میں کرتے ہیں: کہ مذاکرات کے بغیر کوئی راستہ نہیں بچا۔خان صاحب کو سب سے پہلے خود مثال قائم کرنا ہوگی۔ بیانات میں نرمی، لب و لہجے میں وقار، اور بیانیے میں شائستگی لانی ہوگی۔ اگر ایک طرف انقلابی نعرے ہوں اور دوسری طرف مفاہمتی اشارے، تو نتیجہ پھر وہی ہو گا جو پچھلے تین سال میں بار بار دیکھا جا چکا ہے: بند دروازے، ناکامی، اور سیاسی تنہائی۔
سیاست دشمنی نہیں، اختلاف رائے کا مہذب اظہار ہے۔ اگر عمران خان واقعی خود کو عوام کا سب سے مقبول لیڈر سمجھتے ہیں تو پھر ان کا اولین فرض ہے کہ وہ قوم کو جوڑیں، نفرت کی سیاست کو خیرباد کہیں، اور اصلاح، مفاہمت اور حقیقت پسندی کو اپنی سیاست کا محور بنائیں۔جتنا جلد وہ اس راستے کا انتخاب کر لیں، اتنا ہی ان کے لیے، ان کی پارٹی کے لیے، اور ملک کے لیے بہتر ہو گا۔