تحریر : شہباز خان

پاکستان تحریک انصاف (پی ٹی آئی) اس وقت اپنی تاریخ کے سب سے شدید اندرونی بحران سے دوچار ہے۔ جہاں ایک وقت میں پارٹی کا ہر کارکن اور رہنما بانی چیئرمین عمران خان کے بیانیے کا پرجوش ترجمان تھا، وہیں آج پارٹی کے اندر اختلافات کی ایسی خلیج پیدا ہو چکی ہے کہ نہ صرف باہمی بدگمانیاں عروج پر ہیں بلکہ کھلے عام بیانیے کی تصدیق و تردید کا سلسلہ جاری ہے۔اڈیالہ جیل میں قید عمران خان سے ملاقات کرنے والے ہر رہنما کی میڈیا سے گفتگو ایک الگ کہانی سناتی ہے۔ کوئی مفاہمت کی بات کرتا ہے، تو کوئی مزاحمت کو ہی واحد راستہ قرار دیتا ہے۔ پارٹی کا نظم و ضبط بکھرتا جا رہا ہے اور اختلافات اس حد تک شدت اختیار کر چکے ہیں کہ پارٹی منشور کو خود اس کے قائدین کے ہاتھوں پامال ہوتے دیکھا جا رہا ہے۔یہ واضح ہو چکا ہے کہ پی ٹی آئی میں دو بیانیے آمنے سامنے آ چکے ہیں۔ ایک طرف وہ حلقہ ہے جو سمجھتا ہے کہ عمران خان کا حوصلہ اب ساتھ چھوڑ رہا ہے اور ان کی رہائی کے لیے اسٹیبلشمنٹ سے مذاکرات ناگزیر ہو چکے ہیں۔ اس بیانیے کے مطابق بین الاقوامی اور قومی سطح پر راستے نکالنے کی کوشش ہونی چاہیے تاکہ پارٹی بانی کسی سیاسی حل کے ذریعے باہر آ سکیں۔ دوسری جانب وہ رہنما ہیں جو سمجھتے ہیں کہ اس وقت مفاہمت کا کوئی بھی اشارہ پارٹی کی اخلاقی فتح کو شکست میں بدل سکتا ہے، اور اس سے کارکنوں کا مورال بری طرح متاثر ہوگا۔حال ہی میں عمران خان کی ہمشیرہ علیمہ خان کی جانب سے اسٹیبلشمنٹ کو براہِ راست مخاطب کر کے مذاکرات کی دعوت دینا نہ صرف چونکانے والا لمحہ تھا، بلکہ اس سے پارٹی کے اندر جاری کشمکش کی شدت بھی عیاں ہو گئی۔ ان کے بعد پارٹی چیئرمین بیرسٹر گوہر خان نے فوراً وضاحت دینے کی کوشش کی کہ عمران خان ذاتی رہائی نہیں بلکہ عوام کی خاطر جدوجہد کر رہے ہیں۔ لیکن حقیقت یہی ہے کہ پی ٹی آئی کے ہر رہنما کا بیانیہ اب اپنی الگ ترجمانی لیے ہوئے ہے۔
تحریک انصاف کے کچھ بااثر حلقوں کا ماننا ہے کہ عمران خان کے اردگرد موجود ناتجربہ کار اور غیرسیاسی افراد، جو صرف خوشنودی کی سیاست کر رہے ہیں، اصل خطرہ ہیں۔ وہ نہ پارٹی کو منظم کرنے کی صلاحیت رکھتے ہیں اور نہ ہی سیاسی بصیرت۔ ان کی واحد ترجیح عمران خان کو خوش رکھنا اور بیانیے کو غیر حقیقت پسند خوابوں میں الجھائے رکھنا ہے۔ادھر "قوم یوتھ" جس پر عمران خان نے سب سے زیادہ اعتماد کیا، آج سیاسی تربیت اور اخلاقی بلوغت سے محروم ایک ہجوم کی شکل اختیار کر چکی ہے۔ اس ہجوم سے کسی قومی اصلاح کی امید رکھنا خود فریبی کے سوا کچھ نہیں۔
یہ داخلی خلفشار اس وقت مزید نمایاں ہوا جب 9 مئی کے افسوسناک واقعات نے پی ٹی آئی کو ریاستی اداروں سے براہِ راست تصادم کی راہ پر ڈال دیا۔ قومی تنصیبات پر حملے، جلاؤ گھیراؤ، اور افواج پاکستان کے خلاف بیانات نے دشمنوں کو تو خوشی دی، مگر پارٹی کو ناقابل تلافی نقصان پہنچایا۔اس سب کے بعد اگر لانگ مارچ ہری پور کے راستے صرف مارگلہ کی پہاڑیوں تک محدود رہنے کا اعلان کیا جا رہا ہے، تو یہ درحقیقت پی ٹی آئی قیادت کے اندر چھپے خوف اور مصلحت پسندی کا اظہار ہے۔ یہ محض حکمت عملی میں تبدیلی نہیں، بلکہ قیادت میں اعتماد کی کمی اور بے سمتی کا ثبوت ہے۔تحریک انصاف جس بیانیے اور نظم و ضبط کے دم پر ابھری تھی، وہ اب اندرونی تضادات اور شخصی سیاست کی نذر ہو چکا ہے۔ اگر پارٹی نے سنجیدگی سے اپنی صفوں کو نہ سنبھالا، تو وہ مقام جو کبھی تبدیلی کی امید بن کر ابھرا تھا، تاریخ کا ایک اور عبرت ناک باب بن جائے گا۔