شیراز خان          

گزشتہ دنوں خطے میں ایک بار پھر پاک بھارت کشیدگی اپنے عروج پر پہنچی اور حالات نے اچانک جنگ کا رخ اختیار کر لیا۔ بھارت نے جارحیت کا مظاہرہ کرتے ہوئے پاکستان کی حدود میں نہتے شہریوں، معصوم بچوں اور بے گناہ عورتوں کو نشانہ بنایا۔ یہ قدم بزدلی اور غیر ذمہ دارانہ سوچ کا عکاس تھا۔ تاہم، دشمن شاید یہ بھول گیا تھا کہ پاکستان کوئی کمزور ملک نہیں، بلکہ ایک ایٹمی قوت ہے جو امن کی خواہاں ضرور ہے، مگر اپنی سالمیت پر کبھی سمجھوتہ نہیں کرتا،
بھارت کی اس ناپاک جارحیت کا فوری اور مؤثر جواب پاک فوج نے "آپریشن بنیان مرصوص" کی صورت میں دیا۔ یہ آپریشن نہ صرف عسکری اعتبار سے ایک کامیاب حکمت عملی کا مظہر تھا، بلکہ اس نے دشمن کو ایک ایسی شکست سے دوچار کیا جسے وہ چھپانے کی لاکھ کوشش کے باوجود دنیا سے نہیں چھپا سکا۔ بھارت کا "تماشا سندور" نامی حملہ دنیا کی نظروں میں مضحکہ خیز اور بے بنیاد ثابت ہوا، جب کہ پاکستان کی جانب سے کیا گیا ردعمل جرات، مہارت اور حب الوطنی کی اعلیٰ مثال بن کر دنیا کے سامنے آیا۔
اس جنگ نے جہاں پاکستان کی عسکری قوت اور پیشہ ورانہ صلاحیتوں کو ثابت کیا، وہیں ایک اور حیران کن اور خوش آئند پہلو یہ تھا کہ پاکستان ایک بار پھر یک جان ہو گیا۔ کیا پنجابی کیا سندھی، بلوچی، پختون ، کشمیری اور گلگتی سب ایک پرچم تلے متحد ہو گئے۔ اس اتحاد کا منظر دیدنی تھا، جب ہر زبان، ہر رنگ، ہر نسل کے پاکستانی کی نظریں پاک فوج پر تھیں اور ایک ہی آواز میں وطن کی فتح کی دعا کر رہا تھا۔
 بھارت میں بسنے والے مسلمان بھی اس بار پیچھے نہ رہے اور جس طرح ممکن ہوا ہندوتوا کو فاش کیا، انہوں نے دل سے پاکستان کے لیے دعائیں کیں اور اس کے حق میں آواز بلند کی۔ ہر بار کی طرح اس بار خاص طور پر سکھ برادری کی طرف سے پاکستان کی حمایت اور غیر معمولی جذبہ دیکھا گیا۔ پوری دنیا نے دیکھا کہ جب نیت صاف ہو، مقصد حق پر ہو اور دفاع مضبوط ہو، تو دشمن کے پروپیگنڈے دم توڑ جاتے ہیں۔
پاکستان کی اس شاندار فتح پر نہ صرف ہمارے برادر اسلامی ممالک بلکہ ترکی، آذربائیجان، بنگلہ دیش اور انڈونیشیا جیسے دوست ممالک کی عوام نے بھی خوشی کا اظہار کیا۔ سوشل میڈیا پر پاکستانی پرچموں کی بہار تھی، لوگوں نے پاک فوج کے حق میں پوسٹس لکھیں، دعائیں کیں اور عالمی سطح پر پاکستان کی سربلندی کا جشن منایا۔ یہ مناظر ثابت کرتے ہیں کہ پاکستان تنہا نہیں، بلکہ دنیا بھر میں اس کے دوست موجود ہیں جو اس کے ساتھ کھڑے ہیں۔
دوسری جانب بھارت کو اس عبرتناک شکست کے بعد شدید عالمی دباؤ اور رسوائی کا سامنا کرنا پڑا۔ نہ صرف اس کے عوام میں بے چینی بڑھ گئی بلکہ اس کا میڈیا بھی سچ چھپانے میں ناکام رہا۔ آج بھارت کے ارباب اختیار نہ اپنے عوام کو جواب دے پا رہے ہیں، نہ ہی دنیا کو مطمئن کر پائے ہیں۔ ایسے میں مذاکرات کی میز پر آنا ان کے لیے مجبوری بن چکا ہے۔
ذرائع کے مطابق، پاکستان اور بھارت کے درمیان اب تین نکاتی مذاکرات کا عمل زیر غور ہے، جن میں سرفہرست مسئلہ کشمیر ہے۔ اس موقع پر بھارت کو سمجھ لینا چاہیے کہ اب وقت بدل چکا ہے۔ پاکستان نے جس جرات و بہادری کا مظاہرہ کیا ہے، اس کے بعد اگر بھارت پھر سے طاقت کے زعم میں آ کر کوئی غلطی کرے گا، تو نتیجہ اس بار کہیں زیادہ سنگین ہو گا۔
اب وقت آ گیا ہے کہ بھارت ضد، ہٹ دھرمی اور فریب کاری کی پالیسی ترک کر کے حقیقت کا سامنا کرے اور خطے کے امن کو موقع دے۔ مذاکرات کو سنجیدگی سے لیا جائے، پاکستان کے جائزمطالبات تسلیم کیے جائیں، اور مسئلہ کشمیر کو کشمیری عوام کی خواہشات کے مطابق حل کیا جائے۔ بصورت دیگر، تاریخ گواہ ہے کہ پاکستان اپنی خودداری اور خودمختاری پر کبھی آنچ نہیں آنے دیتا۔
آخر میں یہی کہوں گا کہ یہ جنگ ہمیں متحد کر گئی، ہمارے ایمان کو تازہ کر گئی، اور دنیا کو ایک بار پھر یاد دلا گئی کہ "پاکستان زندہ باد" صرف نعرہ نہیں، بلکہ ہر پاکستانی کا ایمان ہے اور ایمان پر جان دیں گے۔