بہاولپور (رائیس الاخبارتازہ ترین 04 جون 2025ء)
وزیر اعلیٰ پنجاب کی ہدایت پر ایران میں جاں بحق ہونے والے احمد پور اور سمہ سٹہ کے آٹھ افراد کے لواحقین میں فی خاندان 10 لاکھ روپے کے امدادی چیک تقسیم کیے گئے۔

چیک وفاقی پارلیمانی سیکرٹری برائے ریلویز میاں محمد عثمان نجیب اویسی، صوبائی پارلیمانی سیکرٹری برائے بورڈ آف ریونیو و رکن پنجاب اسمبلی میاں محمد شعیب اویسی، اور ڈپٹی کمشنر بہاولپور ڈاکٹر فرحان فاروق نے تقسیم کیے۔

وفاقی پارلیمانی سیکرٹری نے لواحقین سے اظہار تعزیت کرتے ہوئے مرحومین کی مغفرت، درجات کی بلندی اور پسماندگان کے لیے صبر جمیل کی دعا کی۔ انہوں نے کہا کہ اللہ تعالیٰ لواحقین کو یہ صدمہ برداشت کرنے کی ہمت عطا فرمائے اور مرحومین کے درجات بلند کرے۔

تقریب کے موقع پر اسسٹنٹ کمشنر بہاولپور صدر قراۃ العین، اسسٹنٹ کمشنر احمد پور شرقیہ محمد نوید حیدر اور لواحقین بھی موجود تھے۔

ڈپٹی کمشنر ڈاکٹر فرحان فاروق نے کہا کہ ضلعی انتظامیہ اس دکھ کی گھڑی میں لواحقین کے شانہ بشانہ کھڑی ہے اور ہر ممکن تعاون فراہم کیا جائے گا۔