ہر سال ہزاروں امیدوار سی ایس ایس میں کیوں فیل ہوتے ہیں؟ سینیٹ کمیٹی میں بڑی وجوہات سامنے آ گئیں

اسلام آباد: پاکستان میں ہر سال ہزاروں نوجوان سی ایس ایس (سنٹرل سپیریئر سروسز) کے امتحان میں شرکت کرتے ہیں، مگر کامیابی صرف چند امیدواروں کے حصے میں آتی ہے۔ اس صورتِ حال پر سینیٹ کی قائمہ کمیٹی میں تفصیلی بحث کی گئی، جس میں امتحان میں ناکامی کی بڑی وجوہات کا انکشاف کیا گیا۔

سیکریٹری فیڈرل پبلک سروس کمیشن (FPSC) نے سینیٹ کمیٹی کو بریفنگ دیتے ہوئے بتایا کہ 90 فیصد امیدوار ابتدائی اسکریننگ مرحلہ تو پاس کر لیتے ہیں، لیکن وہ میرٹ لسٹ میں شامل نہیں ہو پاتے۔ ان کے مطابق امیدواروں کی اکثریت سی ایس ایس کے لازمی مضامین، بالخصوص انگلش، پریسی اور کمپوزیشن میں فیل ہو جاتی ہے۔

کمیٹی کو آگاہ کیا گیا کہ سی ایس ایس میں کامیابی کے لیے لازمی مضامین میں کم از کم 40 فیصد، اختیاری مضامین میں 33 فیصد، اور مجموعی طور پر 50 فیصد نمبر حاصل کرنا ضروری ہوتے ہیں۔ تاہم زیادہ تر امیدوار تحریری امتحان میں مطلوبہ کارکردگی نہیں دکھا پاتے۔

سینیٹر انوشہ رحمان نے تبصرہ کرتے ہوئے کہا کہ موجودہ سی ایس ایس نظام پرانا ہو چکا ہے، جو جدید تعلیم یافتہ نوجوانوں کے لیے موزوں نہیں۔ اُن کا کہنا تھا کہ ’’ہمارا سسٹم روایتی ہے، اور نئے دور کے بچے اس میں فٹ نہیں ہو پا رہے۔‘‘

سیکریٹری FPSC نے مزید بتایا کہ امتحانی کاپیاں چیک کرنے والے ماہرین کے مطابق اکثر امیدواروں کے خیالات غیر منظم ہوتے ہیں، اور وہ اپنی بات کو مؤثر انداز میں بیان نہیں کر پاتے۔ ساتھ ہی یہ بھی کہا گیا کہ امیدواروں کی بڑی تعداد صرف کوچنگ اکیڈمیوں اور گائیڈ بکس پر انحصار کرتی ہے، جس سے ان کی اصل صلاحیت نکھر کر سامنے نہیں آتی۔

بریفنگ میں انکشاف ہوا کہ کئی امیدوار ایسے اختیاری مضامین کا انتخاب کرتے ہیں جن سے ان کا کوئی سابقہ تعلق یا مطالعہ نہیں ہوتا، صرف اس وجہ سے کہ وہ "اسکورنگ" سمجھے جاتے ہیں۔

اس موقع پر اسٹبلشمنٹ ڈویژن کے نمائندوں نے تجویز دی کہ سی ایس ایس کے مضامین کو جدید تقاضوں کے مطابق بنایا جائے، کچھ پرانے مضامین اور کیڈرز ختم کیے جائیں، اور "ڈیجیٹل کیڈر" متعارف کروایا جائے تاکہ ٹیکنالوجی سے وابستہ ماہرین اپنی فیلڈ کے مطابق اداروں میں خدمات انجام دے سکیں۔

ایف پی ایس سی کے حکام نے کمیٹی کو یقین دلایا کہ آئندہ سی ایس ایس امتحانات میں اسپیشلائزڈ مضامین شامل کیے جائیں گے تاکہ امیدوار اپنی تعلیم اور مہارت کے مطابق امتحان دے سکیں۔