اسلام آباد — صدرِ مملکت آصف علی زرداری نے ماحولیات کے عالمی دن کے موقع پر اپنے پیغام میں کہا ہے کہ یہ دن ہمیں زمین کی حفاظت اور آئندہ نسلوں کے لیے پائیدار مستقبل کی جانب اپنی ذمہ داریوں کی یاددہانی کراتا ہے۔

صدر مملکت نے کہا کہ پاکستان ان ممالک میں شامل ہے جو موسمیاتی تبدیلیوں سے سب سے زیادہ متاثر ہو رہے ہیں۔ تباہ کن سیلاب، خشک سالی، اور گرمی کی شدید لہریں لاکھوں پاکستانیوں کی زندگیوں کو متاثر کر رہی ہیں، جبکہ عالمی کاربن کے اخراج میں پاکستان کا حصہ 1 فیصد سے بھی کم ہے۔

انہوں نے کہا کہ "محدود وسائل کے باوجود پاکستان ماحولیاتی چیلنجز سے نمٹنے کے لیے پرعزم ہے اور مختلف اقدامات اٹھا رہا ہے۔" صدر مملکت نے اس بات پر زور دیا کہ موسمیاتی تبدیلی سے نمٹنے کے لیے معاشرے کے ہر فرد اور ادارے کو کردار ادا کرنا ہوگا۔

انہوں نے عوام سے اپیل کی کہ وہ اپنی روزمرہ زندگی میں ماحول دوست عادات اپنائیں، جیسے پلاسٹک کا کم استعمال، جنگلات کا فروغ، ری سائیکلنگ، اور ماحولیاتی تحفظ کی پالیسیوں پر عمل درآمد۔

صدر مملکت نے کہا: "میں ہر شہری اور ادارے پر زور دیتا ہوں کہ وہ ایک صاف، سرسبز اور محفوظ پاکستان کے لیے متحد ہو جائیں۔" انہوں نے کہا کہ ماحولیاتی تبدیلیوں کا مقابلہ، حیاتیاتی تنوع کا تحفظ، اور قدرتی وسائل کا ذمہ دارانہ استعمال ہماری مشترکہ ترجیحات میں شامل ہونا چاہیے۔