لاہور: وزیراعلیٰ پنجاب مریم نواز شریف نے آج صوبائی کابینہ کے 27ویں اجلاس کی صدارت کی اور ایک اہم پالیسی بیان جاری کیا۔

 جس میں صوبے کے مالیاتی انتظام، ترقیاتی اہداف اور عوام پر مرکوز حکمرانی کے عزم کا اعادہ کیا گیا۔ انہوں نے اس بات پر زور دیا کہ "پائی پائی عوام کی امانت ہے اور ہم اللہ تعالیٰ کے سامنے جوابدہ ہیں۔"

وزیراعلیٰ نے آئندہ مالی سال کے بجٹ کو "زیرو ٹیکس بجٹ" قرار دیا، جس میں عوام پر کوئی نیا ٹیکس بوجھ نہیں ڈالا جائے گا۔ انہوں نے مزید کہا کہ یہ پنجاب کی تاریخ کا سب سے بڑا ترقیاتی بجٹ ہوگا، جس کے لیے وہ فخر کرتی ہیں کہ اتنے بڑے ترقیاتی فنڈ کے باوجود کوئی مالیاتی سکینڈل سامنے نہیں آیا۔ مریم نواز نے کہا، "پچھلا ترقیاتی بجٹ بھی ایک ریکارڈ تھا، اور ہم اپنے سارے ریکارڈ خود توڑیں گے۔"

ترقیاتی منصوبوں کے حوالے سے، مریم نواز شریف نے بتایا کہ صوبے میں 700 سڑکیں بن رہی ہیں، جن کی تعمیر و توسیع 12 ہزار کلومیٹر تک ہوگ۔
ٹیکس کے حوالے سے، وزیراعلیٰ نے ٹیکس بڑھانے کی بجائے ٹیکس نیٹ پر توجہ دینے کی اہمیت پر زور دیا۔ انہوں نے کہا کہ ان کی حکومت کی پوری توجہ عوام پر مرکوز ہے، اور صحت اور تعلیم کے شعبوں میں اتنا بڑا بجٹ آج تک کسی مثال میں نہیں ملتا۔ انہوں نے وضاحت کی کہ دو چار بڑے پراجیکٹس بنانے کی بجائے پنجاب میں 94 نئے پروگرام لائے گئے ہیں۔

عوامی سہولیات کی فراہمی کے بارے میں، مریم نواز شریف نے اعلان کیا کہ فری میڈیسن اب ہر جگہ دستیاب ہوں گی۔ اس سال سکولوں میں ضروری سہولتوں کی فراہمی کا ہدف پورا کیا جائے گا۔ انہوں نے تسلیم کیا کہ عوام کی خدمت اور بھرپور تبدیلی کے لیے وقت بہت کم ہے، اور گزشتہ 40 سالوں میں 40 ہزار سے زائد گھر بھی نہیں بن سکے، جس سے عوام کی خدمت ان کی اولین ذمہ داری ہے۔
وزیراعلیٰ نے اپنی ٹیم کی کارکردگی کو سراہتے ہوئے کہا کہ سینئر منسٹر نے رات بھر جاگ کر کام کیا، جس پر وہ انہیں شاباش دیتی ہیں۔ انہوں نے چیف سیکرٹری اور ان کی پوری ٹیم کو بھی مبارکباد دی اور بتایا کہ نواز شریف بھی ان کی تعریف کرتے ہیں۔ انہوں نے مزید کہا کہ عوامی خدمت کا ایک تاریخی پیکج پیش کیا جا رہا ہے، اور انہیں ہر ڈیپارٹمنٹ سے متعلق اعداد و شمار زبانی یاد ہیں۔

اپنے خطاب کے آخر میں، مریم نواز شریف نے کہا کہ "اقتدار اللہ تعالیٰ کی امانت ہے اور مخلوق کی خدمت ہمارا مشن ہے۔" انہوں نے سرکاری ملازمین کو کارکردگی کی بنیاد پر ایڈیشنل پرفارمنس بونس دینے کا جائزہ لینے کا بھی اعلان کیا۔ انہوں نے مزدور کو کم از کم اجرت 40 ہزار روپے دینے اور اجرتوں کے نظام کو ڈیجیٹلائز کرنے کی ضرورت پر زور دیا۔
اجلاس میں بتایا گیا کہ پنجاب میں مقامی قرضوں کی شرح میں 94 فیصد ریکارڈ کمی آئی ہے۔ سینئر منسٹر/وزیر پلاننگ اینڈ ڈویلپمنٹ مریم اورنگزیب اور فنانس منسٹر نے اجلاس میں تفصیلی بریفنگ دی۔