اسلام آباد: ڈائریکٹر جنرل محکمہ موسمیات، مہر صاحبزاد خان نے میڈیا سے گفتگو کرتے ہوئے مون سون سیزن 2025 کے حوالے سے اہم پیشگوئی جاری کر دی ہے۔

ان کا کہنا ہے کہ ملک کے وسطی اور جنوبی علاقوں میں معمول سے قدرے زیادہ بارشیں متوقع ہیں، جب کہ شمالی علاقہ جات اور گلگت بلتستان میں معمول سے کم بارشیں ہو سکتی ہیں۔

ڈی جی موسمیات کے مطابق، شمال مشرقی پنجاب میں بھی بارشیں معمول سے زیادہ ہوں گی، جبکہ جولائی تا ستمبر پورے ملک میں درجہ حرارت معمول سے بلند رہنے کا امکان ہے، خصوصاً کشمیر، خیبر پختونخوا اور گلگت بلتستان میں درجہ حرارت معمول سے زیادہ ریکارڈ ہونے کی توقع ہے۔

انہوں نے خبردار کیا کہ بالائی علاقوں میں شدید بارشوں کے باعث انتہائی سیلابی صورتحال پیدا ہو سکتی ہے، جب کہ سندھ، پنجاب، خیبر پختونخوا اور کشمیر کے بڑے شہروں میں اربن فلڈنگ کا خدشہ ہے۔

محکمہ موسمیات نے شہریوں کو موسم کی مسلسل اپڈیٹس سے باخبر رہنے اور بارشوں کے دوران غیر ضروری سفر سے گریز کرنے کی ہدایت کی ہے۔