اسلام آباد: وزیراعظم محمد شہباز شریف کی زیر صدارت فیڈرل بورڈ آف ریونیو (ایف بی آر) کے امور کے حوالے سے ایک جائزہ اجلاس منعقد ہوا۔ 

وزیراعظم نے ایف بی آر میں جاری اقدامات اور اصلاحات کی تھرڈ پارٹی ویلیڈیشن کے لیے عالمی شہرت یافتہ کمپنیوں کی خدمات حاصل کرنے کی ہدایت کی۔

وزیراعظم نے اس موقع پر اظہار خیال کرتے ہوئے کہا کہ "معرکہ حق کی تاریخ ساز فتح کے بعد، ملکی اداروں میں پائیدار اصلاحات کے ذریعے پاکستان کو ایک مستحکم عالمی معیشت بنانے کی جدوجہد میں فتح یاب ہونے کے لیے حکومت پاکستان پرعزم ہے۔" انہوں نے مزید کہا کہ تمام شعبوں میں ادارہ جاتی اصلاحات تیزی سے جاری ہیں۔ وزیراعظم نے اس بات پر زور دیا کہ حکومتی ادارے ملک کے اداروں سے کرپشن کے انسداد اور شفافیت کی عدم موجودگی جیسی خامیوں کو دور کرنے کے لیے انتھک محنت کر رہے ہیں۔ ان کا کہنا تھا کہ حالیہ مثبت معاشی اشاریے حکومتی پالیسیوں کی درست سمت کا منہ بولتا ثبوت ہیں۔

وزیراعظم نے فیس لیس کسٹمز اسیسمنٹ سسٹم کی حالیہ کارکردگی پر اطمینان کا اظہار کرتے ہوئے کہا کہ شفافیت کو برقرار رکھنے کے لیے لائی گئی ایسی اصلاحات کے حوصلہ افزا نتائج سامنے آ رہے ہیں۔ انہوں نے یقین دلایا کہ "انشاء اللہ پاکستان کو معاشی طور پر مستحکم بنانے کی اس جدوجہد میں ہم کامیاب ہوں گے۔"

اجلاس میں وزیراعظم کو فیس لیس کسٹمز اسیسمنٹ سسٹم کی حالیہ کارکردگی اور پاکستان ریونیو آٹومیشن لمیٹڈ (پی اراےایل) میں اصلاحات کی پیشرفت کے حوالے سے آگاہ کیا گیا۔ بریفنگ میں بتایا گیا کہ فیس لیس کسٹمز اسیسمنٹ سسٹم کے نفاذ سے محصولات میں مجموعی طور پر اضافہ ہوا ہے اور کسٹمز کلیئرنس کے دورانیے میں خاطر خواہ کمی آئی ہے۔ مزید بتایا گیا کہ پاکستان ریونیو آٹومیشن لمیٹڈ میں اصلاحات کا عمل تیزی سے جاری ہے اور عام صارفین کے لیے ایک آسان ڈیجیٹل ٹیکس ریٹرن کا نظام جلد نافذ العمل کیا جائے گا۔ بریفنگ میں یہ بھی بتایا گیا کہ عام صارفین کی سہولت کے لیے ڈیجیٹل ٹیکس ریٹرن کے نظام کو اردو اور دیگر مقامی زبانوں میں متعارف کرنے کے عمل پر کام تیزی سے جاری ہے۔

اجلاس میں وفاقی وزیر قانون و انصاف اعظم نذیر تارڑ، وفاقی وزیر اطلاعات و نشریات عطا اللہ تارڑ، چیئرمین ایف بی آر اور متعلقہ اداروں کے اعلیٰ افسران نے شرکت کی۔