اسلام آباد :پبلک پروکیورمنٹ ریگولیٹری اتھارٹی(پیپرا)پاکستان نے وزیرِاعظم کے وژن برائے شفافیت، گڈ گورننس اور کارکردگی پر عمل کرتے ہوئے 408  ماسٹر ٹرینرز کی تربیت مکمل کر لی۔ 

گزشتہ ایک سال کے دوران پیپرا نے 15 خصوصی تربیتی پروگرامز کا انعقاد کیا تاکہ ای پروکیورمنٹ کے نفاذ کو فروغ دیا جا سکے اور پروکیورمنٹ قوانین پر عملدرآمد کو یقینی بنایا جا سکے ۔
بدھ کو منیجنگ ڈائریکٹر پیپرا حسنات احمد قریشی نے پیپرا ہیڈکوارٹرز میں منعقدہ  تقریب کے دوران تربیتی پروگرامز کے شرکا  میں اسناد تقسیم کیں۔ سند یافتہ ماسٹر ٹرینرز اب ای-پاک ایکوزیشن اینڈ ڈسپوزل سسٹم یعنی ای پیڈز کے حوالے سے اپنے متعلقہ اداروں میں تربیت فراہم کریں گے جس سے پاکستان میں عوامی خریداری کے شعبے میں ڈیجیٹل اور معیاری طریقہ کار کو فروغ ملے گا۔ اپنے خطاب میں حسنات احمد قریشی نے تربیتی پروگرامز کی اہمیت پر زور دیتے ہوئے واضح کیا کہ پیپرا کی تاریخ میں پہلی بار ایک منظم اور جامع تربیتی منصوبہ متعارف کرایا گیا ہے تاکہ ای پروکیورمنٹ کو ادارہ جاتی شکل دی جا سکے اور عوامی فنڈز کے شفاف، مثر اور منصفانہ استعمال کو یقینی بنایا جا سکے۔انہوں نے شرکا سے مطالبہ کیا کہ وہ اپنے محکموں میں خریداری کے عمل کو فعال طریقے سے آگے بڑھائیں اور اپنے ساتھیوں کو ای پیڈز کے مثر استعمال کی تربیت دیں جو پاکستان میں سرکاری خریداری کے عمل میں انقلاب لانے جا رہا ہے۔