خصوصی جج اینٹی کرپشن خاور رشید نے فواد چودھری کے عدالت میں پیش نہ ہونے پر برہمی کا اظہار کرتے ہوئے ان کی فوری گرفتاری کا حکم دیا۔ عدالت نے پولیس کو ہدایت دی کہ فواد چودھری کو گرفتار کر کے 30 جون کو عدالت میں پیش کیا جائے۔

عدالت میں سماعت کے دوران تفتیشی افسر کی جانب سے چالان پیش نہ کرنے پر بھی جج نے سخت ناراضی کا اظہار کیا اور حکم دیا کہ آئندہ پیشی پر مکمل چالان عدالت میں جمع کروایا جائے۔

ذہن نشین رہے کہ فواد چودھری کے خلاف تھانہ اینٹی کرپشن جہلم میں ایک مقدمہ درج ہے، جس میں اُن پر اراضی کے حصول کے لیے مبینہ طور پر بھاری رشوت لینے کا الزام عائد کیا گیا ہے۔ اس مقدمے کی سماعت کئی بار ملتوی ہو چکی ہے، تاہم بارہا طلبی کے باوجود فواد چودھری کی مسلسل غیر حاضری نے معاملے کو سنگین بنا دیا ہے۔

قانونی ماہرین کا کہنا ہے کہ اگر فواد چودھری گرفتاری سے بچنا چاہتے ہیں تو انہیں فوری طور پر عدالت سے رجوع کرنا چاہیے، بصورتِ دیگر انہیں سخت قانونی کارروائی کا سامنا کرنا پڑ سکتا ہے۔