بھارت کی آبی جارحیت کا دوٹوک جواب: پاکستان نے نئے ڈیمز کی تعمیر کا بڑا فیصلہ کر لیا

اسلام آباد: وزیراعظم شہباز شریف کی زیر صدارت ہونے والے اہم اجلاس میں بھارت کی آبی جارحیت کا سخت نوٹس لیتے ہوئے فیصلہ کیا گیا ہے کہ پاکستان اپنے آبی وسائل میں اضافہ کرے گا اور ملک بھر میں نئے ڈیمز تعمیر کیے جائیں گے۔ اس مقصد کے لیے اعلیٰ سطحی کمیٹی قائم کر دی گئی ہے جس کی سربراہی نائب وزیراعظم و وزیر خارجہ اسحاق ڈار کریں گے۔

اجلاس میں چاروں صوبوں، گلگت بلتستان اور آزاد کشمیر کی قیادت نے شرکت کی اور بھارت کے یکطرفہ اقدامات کی شدید مذمت کرتے ہوئے وفاق کے ساتھ یکجہتی کا مظاہرہ کیا۔

اجلاس میں بتایا گیا کہ:

دیامر بھاشا ڈیم کی تعمیر جاری ہے، جو 2032 میں مکمل ہوگا۔

مہمند ڈیم کی تکمیل 2027 تک متوقع ہے۔

اس وقت ملک میں 11 بڑے ڈیمز فعال ہیں، جن کی مجموعی ذخیرہ گنجائش 15.318 ملین ایکڑ فٹ ہے۔

چھوٹے32  ڈیمز پی ایس ڈی پی کے تحت جبکہ 79 دیگر ڈیمز سالانہ ترقیاتی پروگرام میں شامل ہیں۔

وزیراعظم نے اجلاس سے خطاب کرتے ہوئے کہا:"بھارت کی طرف سے سندھ طاس معاہدے کی یکطرفہ معطلی کھلی آبی جارحیت ہے، جس کا جواب ہم بھرپور انداز میں دیں گے۔ جیسے ہم حق کی جنگ میں سرخرو ہوئے، ویسے ہی بھارت کو پانی کی اس لڑائی میں بھی شکست دیں گے۔"

انہوں نے زور دیا کہ

تمام صوبے اور وفاق مل کر نئے آبی ذخائر کی تعمیر پر کام کریں۔

غیر متنازع منصوبوں کو ترجیحی بنیادوں پر مکمل کیا جائے۔

کمیٹی 72 گھنٹوں میں اپنی سفارشات وزیراعظم کو پیش کرے گی۔

یہ فیصلہ ایک نئے اور خودمختار آبی مستقبل کی طرف قدم ہے، جو نہ صرف ہماری زرعی معیشت کو مستحکم کرے گا بلکہ بھارت کی چالوں کا مؤثر توڑ بھی بنے گا۔