مسیحی عبادت گاہوں کے تحفظ کیلئے فول پروف سکیورٹی انتظامات, داخلی اور خارجی راستوں پر موثرچیکنگ ، واک تھرو گیٹس اور سی سی ٹی وی کیمرے نصب 

اسلام آباد: اسلام آباد پولیس کااتوار کے روز مسیحی عبادت گاہوں کے تحفظ کیلئے فول پروف سکیورٹی انتظامات کئے گئے ،سکیو رٹی ڈیوٹی پر تعینات افسران نے عبادات میں مصروف مسیحی برادری کو مکمل تحفظ فراہم کیااور مختلف چرچز کے باہر الرٹ ڈیوٹی پر مامور رہے،داخلی اور خارجی راستوں پر موثرچیکنگ سمیت واک تھرو گیٹس اور سی سی ٹی وی کیمروں کے ذریعے نگرانی عمل میں لائی گئی۔تفصیلات مطابق انسپکٹر جنرل آف پولیس اسلام آباد سیدعلی ناصررضوی کے خصوصی احکامات کی روشنی میں اسلام آباد پولیس نے اتوار کے روز وفاقی دارالحکومت میں واقع چرچز کی سکیورٹی کے لیے بھرپور اقدامات کئے اورعبادات میں مصروف مسیحی برادری کو مکمل تحفظ فراہم کیا، مختلف چرچز کے باہر پولیس افسران اور جوان الرٹ ڈیوٹی پر مامور رہے۔
،ایس ایس پی آپریشنز اسلام آباد محمد شعیب خان نے کہا کہ تمام متعلقہ تھانوں کو خصوصی ہدایات جاری کی گئی تھیں کہ وہ اپنے علاقوں میں قائم عبادت گاہوں کی سکیورٹی کا ازسرِنو جائزہ لیں اور فول پروف انتظامات کو یقینی بنائیں، اسی طرح داخلی اور خارجی راستوں پر چیکنگ سخت کی گئی جبکہ واک تھرو گیٹس اور سی سی ٹی وی کیمروں کے ذریعے نگرانی عمل میں لائی گئی جبکہ سینئر افسران نے مختلف چرچز کا دورہ کر کے سکیورٹی انتظامات کا جائزہ لیا اور موقع پر موجود اہلکاروں کو ضروری ہدایات جاری کیں،اس موقع پر خواتین پولیس اہلکار بھی سکیورٹی ٹیموں کا حصہ رہیں تاکہ فیملیز کو پرسکون ماحول مہیا کیا جاسکے،ایس ایس پی آپریشنز نے کہا کہ تمام اقلیتوں کے جان و مال کا تحفظ ہماری اولین ترجیح ہے،ہم کسی بھی قسم کے ناخوشگوار واقعہ سے نمٹنے کے لیے ہمہ وقت تیار ہیں،اسلام آباد پولیس شہریوں سے بھی اپیل کرتی ہے کہ وہ کسی بھی مشکوک سرگرمی کی اطلاع فوری طور پر قریبی تھانے یا ہیلپ لائن پکار15 پر دیں، تاکہ بروقت کارروائی ممکن بنائی جا سکے۔