اسلام آباد:صدرمملکت آصف علی زرداری 21 جون کو بینظیر ہنر مند پورٹل کا افتتاح کریں گے۔بینظیر انکم سپورٹ پروگرام (بی آئی ایس پی) نے غربت کے خاتمے کی جانب ایک تاریخی قدم اُٹھاتے ہوئے "بینظیر ہنر مند پروگرام (بی ایچ پی)" کے آغاز کا اعلان کیا ہے

جو بی آئی ایس پی کے مستحقین اور ان کے اہل خانہ کے لیے پہلا جامع ہنر مندی کا منصوبہ ہے۔

اس سلسلے میں بی آئی ایس پی ہیڈکوارٹر اسلام آباد میں ایک اعلیٰ سطحی مشاورتی ورکشاپ کا انعقاد کیا گیا، جس کی صدارت چیئرپرسن سینیٹر روبینہ خالد اور سیکریٹری عامر علی احمد نے کی۔ اس ورکشاپ میں "فرینڈز آف بی آئی ایس پی" پلیٹ فارم کے اراکین، چیمبرز آف کامرس اینڈ انڈسٹری، عالمی اداروں جیسے ڈبلیو ایف پی، ڈبلیو ایچ او، جی آئی زیڈ، اور نامور ملکی و بین الاقوامی این جی اوز نے شرکت کی۔

شرکاء نے پروگرام کو خوش آئند قرار دیتے ہوئے اس کی بھرپور حمایت کا اعلان کیا۔ انہوں نے تربیت مکمل کرنے والے افراد کو ملازمت، انٹرن شپ، اور صنعتی روابط فراہم کرنے کا وعدہ کیا۔

یہ پروگرام صدرِ مملکت آصف علی زرداری 21 جون 2025 کو شہید محترمہ بینظیر بھٹو کی سالگرہ کے موقع پر باضابطہ طور پر لانچ کریں گے۔ محترمہ بینظیر بھٹو نے اپنی زندگی سماجی انصاف، خودمختاری، اور وقار کے اصولوں کے لیے وقف کی تھی۔

بی آئی ایس پی کی چیئرپرسن روبینہ خالد کاکہناہے کہ بی آئی ایس پی صرف مالی معاونت کا پروگرام نہیں رہا، بلکہ بااختیار بنانے کا ایک طاقتور پلیٹ فارم بن چکا ہے۔ بینظیر ہنر مند پروگرام کے ذریعے ہم لوگوں کو روزگار کے قابل بنانے کے لیے ضروری ہنر دے رہے ہیں تاکہ وہ خودمختار اور باوقار زندگی گزار سکیں۔ شہید محترمہ بینظیر بھٹو کا یہ ماننا تھا کہ 'ہنر ہی اصل سرمایہ ہے۔
انہوں نے مزید کہا کہ اس پروگرام میں دستکاروں کو بھی شامل کیا جائے گا اور ان کے ہاتھ سے بنے ہوئے مصنوعات کو مارکیٹ سے جوڑنے کے اقدامات کیے جائیں گے تاکہ ان کی محنت آمدنی میں تبدیل ہو سکے۔
سیکریٹری عامر علی احمد نے پروگرام کی شفافیت، شمولیت، اور عوامی مرکزیت پر زور دیتے ہوئے تمام شراکت داروں کی فعال شرکت کو سراہا اور کہا کہ یہ باہمی تعاون ہی اس پروگرام کی کامیابی کو یقینی بنائے گا۔
بینظیر ہنر مند پروگرام ہنر کی ترقی کو غربت سے نجات اور معیشت میں شمولیت کا ذریعہ بنائے گا۔ اس پروگرام میں 50 فیصد شرکاء خواتین ہوں گی، جو خواتین کو بااختیار بنانے کے لیے بی آئی ایس پی کے عزم کی عکاسی ہے۔فوری امداد سے لے کر پائیدار خودمختاری کی طرف سفرکایہ تاریخی اقدام بی آئی ایس پی کے مشن میں ایک انقلابی تبدیلی ہے۔