عید قربان سے پہلے قسائیوں نے نرخ بڑھا دیے، اناڑی قسائیوں کی بھی چاندی ہو گئی

لاہور: عید قربان قریب آتے ہی جہاں جانوروں کی خریداری عروج پر ہے، وہیں قسائیوں نے بھی اپنی "قربانی" کی قیمتوں میں خوب اضافہ کر دیا ہے۔ شہریوں کو جانور ذبح کروانے کے لیے تجربہ کار قسائیوں کی تلاش تو ہے ہی، اب اناڑی قسائی بھی مارکیٹ میں آ گئے ہیں جنہوں نے آدھی قیمت پر خدمات فراہم کرنے کی پیشکش کر دی ہے۔

رئیس الاخبار کی رپورٹ کے مطابق، لاہور سمیت مختلف شہروں میں قسائیوں نے عید الاضحیٰ کے تینوں دنوں کے لیے ریٹ مقرر کر لیے ہیں۔
پہلے دن:
بکرے کی قربانی — 10,000 روپے
 گائے کی قربانی — 18,000 روپے
دوسرے دن:
 بکرا — 6,000 روپے
 گائے — 10,000 روپے

رپورٹس کے مطابق پیشہ ور قسائیوں کے ان ریٹس کو دیکھ کر اب اناڑی قسائیوں نے بھی شہریوں کی جیبوں پر ہاتھ صاف کرنے کی تیاری کر لی ہے۔ دیہی علاقوں سے آئے یہ غیر تربیت یافتہ قسائی گروپوں کی صورت میں شہروں میں ڈیرے ڈال چکے ہیں، اور آدھی قیمت میں جانور ذبح کرنے کی بکنگ کر رہے ہیں۔

شہریوں نے شکایت کی ہے کہ قسائی حضرات خاص طور پر "وی آئی پی جانوروں" کے لیے منہ مانگے دام طلب کر رہے ہیں، اور کسی قسم کا چیک اینڈ بیلنس موجود نہیں۔ بہت سے شہریوں کا کہنا ہے کہ اگر انتظامیہ نے اس معاملے میں فوری اقدامات نہ کیے تو قربانی کے ساتھ ساتھ شہریوں کی جیب بھی قربان ہو جائے گی۔

ماہرین کا کہنا ہے کہ قربانی ایک عبادت ہے، مگر اس عبادت کو کاروبار بنانے کا رجحان ہر سال بڑھتا جا رہا ہے، اور حکومت کو چاہیے کہ قسائیوں کے نرخوں پر کنٹرول کرنے کے لیے مناسب اقدامات کرے۔