ٹیکنالوجی

اسلام آباد: نیشنل سائبر کرائم انویسٹی گیشن ایجنسی نے بڑا اقدام اٹھاتے ہوئے ملک میں آن لائن جوا اور کسینو کی 46 موبائل ایپس کو غیر قانونی قرار دے دیا۔ یہ ایپس شہریوں کے مالی نقصان، ذاتی ڈیٹا کی چوری اور غیر قانونی فارن ایکسچینج ٹرانزیکشنز میں ملوث تھیں۔ فہرست میں مشہور ایپس Aviator Game، 1xBet، Bet365، Dafabet اور دیگر شامل ہیں۔ ان ایپس کے ذریعے نہ صرف صارفین کو جھانسہ دیا جا رہا تھا بلکہ حساس ڈیٹا بھی غیر قانونی نیٹ ورکس کو فروخت کیا جا رہا تھا۔ ایجنسی نے پی ٹی اے کو ہدایت دی ہے کہ ان تمام ایپس کو فوری طور پر بلاک کیا جائے۔ ماہرین کے مطابق یہ اقدام نوجوان نسل کو جوا بازی کے نقصانات سے بچانے اور ملکی معیشت کے تحفظ کی طرف ایک بڑا قدم ہے۔ عوام کو خبردار کیا گیا ہے کہ وہ کسی بھی غیر قانونی ایپ پر اکاؤنٹ نہ بنائیں اور مشکوک سرگرمی کی اطلاع فوری طور پر سائبر کرائم ونگ کو دیں۔