وزیراعلیٰ خیبرپختونخوا کا بانی پی ٹی آئی سے ملاقات کیلئے اڈیالہ جیل پہنچنے پر پولیس سے ٹکراؤ، فیکٹری ناکہ پر دھرنا
وزیراعلیٰ خیبرپختونخوا سہیل آفریدی بانی پی ٹی آئی کی صحت سے متعلق خدشات کے باعث اڈیالہ جیل پہنچے مگر پنجاب پولیس نے انہیں فیکٹری ناکے پر روک دیا جس کے بعد انہوں نے وہیں دھرنا دے دیا۔ وزیراعلیٰ کے ہمراہ ایم این اے شاہد خٹک، ایم پی اے مینا خان آفریدی اور دیگر رہنما بھی موجود تھے۔ جیل روڈ اور اطراف میں سخت سیکیورٹی تعینات ہے جبکہ متعدد ناکوں پر اضافی نفری گشت کر رہی ہے۔ میڈیا سے گفتگو میں سہیل آفریدی نے کہا کہ بانی پی ٹی آئی کی طبیعت ناسازی کی خبریں تشویش بڑھا رہی ہیں، ہم آج ملاقات چاہتے ہیں تاکہ حقیقت سامنے آئے۔ انہوں نے دعویٰ کیا کہ انتخابات میں عوام کا اعتماد متاثر ہوا ہے اور 95 فیصد ووٹر گھروں میں رہے، جو بانی پی ٹی آئی کے ساتھ یکجہتی کا اظہار ہے۔ وزیراعلیٰ نے کہا کہ ملاقات نہ ہونے پر خدشات بڑھ رہے ہیں اور وہ تمام قانونی راستوں پر غور کر رہے ہیں۔ موجودہ حکومت پر بھاری مالی بے ضابطگیوں کے الزامات بھی لگائے۔
فیصل آباد میں کیمیکل فیکٹری کا بوائلر پھٹ گیا، 17 جاں بحق ، بچوں اور خواتین کی چیخوں سے علاقہ گونج اٹھا
فیصل آباد کے علاقے ملک پور کی ایک کیمیکل فیکٹری میں بوائلر پھٹنے سے چار بچوں اور خواتین سمیت 17 افراد جاں بحق جبکہ 20 سے زائد زخمی ہوگئے۔ دھماکے کے نتیجے میں قریب موجود 9 گھروں کی چھتیں بھی گر گئیں۔ ریسکیو ٹیموں نے ملبہ ہٹا کر لاشیں اور زخمیوں کو نکال کر الائیڈ اسپتال منتقل کیا، جہاں متعدد افراد کی حالت تشویشناک ہے۔ پولیس نے فیکٹری منیجر کو گرفتار کرلیا جبکہ مالک موقع سے فرار ہوگیا۔ آئی جی پنجاب نے ریسکیو اداروں کو فوری اقدامات کی ہدایت کی۔
جہلم مذہبی اسکالر انجینئر محمد علی مرزا گرفتار، بعد 30 دن کیلئے جیل منتقل
جہلم پولیس اور ضلعی انتظامیہ نے مذہبی اسکالر انجینئر محمد علی مرزا کو ایک متنازع ویڈیو بیان کے بعد تھری ایم پی او آرڈیننس کے تحت گرفتار کر کے جیل منتقل کر دیا ہے۔ ان کی اکیڈمی کو بھی سیل کر دیا گیا ہے جبکہ داخلی راستوں پر پولیس تعینات کر دی گئی ہے تاکہ امن و امان برقرار رہے۔ انتظامیہ کے مطابق یہ اقدام شہر میں بڑھتی ہوئی کشیدگی کے باعث کیا گیا۔ مرزا کے ناقدین کا کہنا ہے کہ ان کے بیانات سے مذہبی اختلافات کو ہوا ملتی ہے، جبکہ ان کے حامی اس گرفتاری کو اظہارِ رائے کی آزادی پر قدغن قرار دے رہے ہیں۔ سوشل میڈیا پر بھی مرزا کی گرفتاری کے بعد حامیوں اور مخالفین کے درمیان شدید بحث چھڑ گئی ہے اور عوامی رائے تقسیم ہو چکی ہے۔
ملک گیر احتجاج کی کال، ریحانہ ڈار سمیت پی ٹی آئی کے کئی کارکنوں و رہنماء گرفتار
پاکستان تحریک انصاف نے عمران خان کی گرفتاری کے دو سال مکمل ہونے پر احتجاجی تحریک کا آغاز کر دیا، جس کے دوران ملک بھر میں رہنماؤں اور کارکنوں کی گرفتاریاں ہوئیں۔ ریحانہ ڈار کو زبردستی پولیس وین میں بٹھانے کی ویڈیو سامنے آ گئی، جبکہ پی ٹی آئی نے حکومت پر چھاپوں اور تشدد کا الزام عائد کیا ہے۔