پاکستان انڈر 19 والی بال ٹیم کا شاندار ڈیبیو، ورلڈ نمبر 7 بیلجیم کو تین-صفر سے آؤٹ کلاس
تاشقند: پاکستان انڈر 19 والی بال ٹیم نے انڈر 19 ورلڈ چیمپئن شپ میں شاندار آغاز کرتے ہوئے عالمی رینکنگ میں ساتویں نمبر پر موجود بیلجیم کو 0-3 سے شکست دے دی۔
ازبکستان کے دارالحکومت تاشقند میں جاری چیمپئن شپ میں پاکستانی ٹیم نے ہر سیٹ میں زبردست کارکردگی کا مظاہرہ کیا۔ گرین شرٹس نے مقابلہ 25-19، 25-17 اور 25-22 سے اپنے نام کیا۔
عالمی رینکنگ میں انیسویں نمبر پر موجود پاکستان نے نہ صرف بیلجیم کو شکست دی بلکہ کھیل کے تمام شعبوں میں برتری ثابت کی۔
نمایاں کھلاڑی:
- سعود نے 9 شاندار بلاکس سمیت 13 پوائنٹس حاصل کیے
- کپتان یحییٰ نے 11 پوائنٹس کے ساتھ ٹیم کو لیڈ کیا
پاکستانی کھلاڑیوں نے اٹیک، بلاک اور سرو میں نمایاں برتری رکھی، جب کہ بیلجیم کی تکنیکی غلطیوں کا بھی بھرپور فائدہ اٹھایا۔
پاکستان اپنا اگلا میچ جمعہ کو میزبان ازبکستان کے خلاف کھیلے گا۔
