دہشت گردی کی معاونت ختم نہ ہونے تک افغانستان سے تجارت ممکن نہیں، دفتر خارجہ

دہشت گردی کی معاونت ختم نہ ہونے تک افغانستان سے تجارت ممکن نہیں،ترجمان دفتر خارجہ طاہر اندرابی، پاکستان نے ترک قیادت کی کوششوں کا خیر مقدم کیا

اسلام آباد (رئیس الاخبار) :— ترجمان دفتر خارجہ طاہر اندرابی نے کہا ہے کہ افغانستان سے دہشت گردوں کی معاونت اور پاکستان پر حملے ختم نہ ہونے تک دونوں ممالک کے درمیان تجارت بحال نہیں ہوسکتی۔

ہفتہ وار پریس بریفنگ کے دوران گفتگو کرتے ہوئے ترجمان نے کہا کہ پاکستان نے ہمیشہ کوشش کی کہ سیکیورٹی اور تجارت کو ایک دوسرے سے الگ رکھا جائے، تاہم افغانستان کی جانب سے پاکستان کے تاجروں اور شہریوں پر حملوں کا سلسلہ بڑھتا جا رہا ہے، جس کے بعد افغانستان سے تجارت جاری رکھنا ممکن نہیں رہا۔

طاہر اندرابی نے بتایا کہ افغانستان کی سرزمین سے پاکستانی حدود میں مسلسل دہشت گرد حملے کیے گئے، جن میں عام شہریوں کے ساتھ ساتھ تجارتی سرگرمیاں بھی نشانہ بنیں۔ ان کا کہنا تھا کہ "پاکستان اپنے شہریوں کی جانوں کی قیمت پر تجارت نہیں کر سکتا۔”

ترکیہ کی جانب سے پاک–افغان ثالثی کے کردار کا حوالہ دیتے ہوئے ترجمان نے کہا کہ پاکستان نے ترک قیادت کی کوششوں کا خیر مقدم کیا ہے۔ انہوں نے بتایا کہ ترکیہ کے ثالثی وفد کا دورہ نائب صدر کے غیر ملکی دوروں کی وجہ سے مؤخر ہوا ہے، تاہم پاکستان کو امید ہے کہ یہ عمل جلد آگے بڑھے گا۔

ترجمان نے کہا کہ کئی ممالک پاک–افغان مذاکرات اور ثالثی میں دلچسپی رکھتے ہیں، جبکہ دونوں ممالک کے سفارت خانے معمول کے مطابق کام کر رہے ہیں، اور رابطوں کے تمام چینلز کھلے ہوئے ہیں۔

انہوں نے مزید کہا کہ پاک–بھارت جنگ سے متعلق امریکی کانگریس کی حالیہ تحقیقی رپورٹ کا پاکستان خیر مقدم کرتا ہے، جبکہ خطے میں کشیدگی کم کرنے اور غزہ جنگ بندی کے لیے امریکی کردار کی بھی تعریف کی جاتی ہے۔

ترجمان دفتر خارجہ نے اس عزم کا اظہار کیا کہ پاکستان اپنی سرزمین کے تحفظ کے لیے تمام ضروری اقدامات جاری رکھے گا۔

🔴LIVE: Spokesperson's Weekly Press Briefing 21-11-2025 at Ministry of Foreign Affairs, Islamabad https://t.co/T2REsyhtbp
— Ministry of Foreign Affairs - Pakistan (@ForeignOfficePk) November 21, 2025