روس میں فضائی سانحہ: مسافر طیارہ گر کر تباہ، 49 افراد جاں بحق
ماسکو: روس کے مشرقی علاقے میں ایک مسافر بردار طیارہ دورانِ پرواز گر کر تباہ ہو گیا، حادثے میں سوار تمام 49 افراد ہلاک ہو گئے۔
تفصیلات کے مطابق سائبیریا کی "انگارا ایئرلائن” کا Antonov An-24 طیارہ چین کی سرحد کے قریب واقع قصبے ٹائندا کے قریب گر کر تباہ ہوا۔ طیارے میں 43 مسافر (جن میں 5 بچے بھی شامل تھے) اور 6 عملے کے ارکان سوار تھے۔
روسی نیوز ایجنسیوں اور علاقائی حکام نے حادثے کی تصدیق کرتے ہوئے بتایا کہ طیارہ لینڈنگ کی دوسری کوشش کے دوران ریڈار سے لاپتا ہو گیا۔ بعد ازاں، Mi-8 ہیلی کاپٹر نے طیارے کا جلا ہوا ملبہ ٹائندا سے 15 کلومیٹر جنوب میں واقع گھنے جنگلاتی علاقے میں دریافت کیا۔
حادثے کی ممکنہ وجہ:
روس کی خبر رساں ایجنسی کے مطابق، حادثے کے وقت موسم انتہائی خراب تھا اور کم ویژن کے باعث لینڈنگ میں دشواری پیش آئی۔ طیارہ زمین سے ٹکرا کر آگ کی لپیٹ میں آ گیا۔
گورنر واسیلی اورلوف نے بتایا کہ تمام ریسکیو اداروں کو فوری طور پر متحرک کیا گیا، لیکن افسوسناک طور پر کوئی مسافر زندہ نہیں بچ سکا۔
واقعے کی مکمل تفتیش جاری ہے تاکہ حادثے کی حتمی وجوہات معلوم کی جا سکیں۔
