🔹 بلوچستان: جوڑے کے قتل کا حکم دینے والا سردار شیر باز ستکزئی 10 روزہ جسمانی ریمانڈ پر پولیس کے حوالے
کوئٹہ:
ڈگاری میں کاروکاری کے الزام میں خاتون اور مرد کے بہیمانہ قتل کے کیس میں نامزد قبائلی سردار شیر باز ستکزئی کو انسداد دہشت گردی عدالت نے 10 روزہ جسمانی ریمانڈ پر ایس سی آئی ڈبلیو کے حوالے کر دیا۔
تفصیلات کے مطابق، کوئٹہ کی انسداد دہشت گردی عدالت میں کیس کی سماعت جج محمد مبین کی عدالت میں ہوئی، جس میں ملزم سردار شیر باز ستکزئی کو پیش کیا گیا۔ ایس سی آئی ڈبلیو نے مزید جسمانی ریمانڈ کی استدعا کی، جسے عدالت نے منظور کرتے ہوئے ملزم کو مزید تفتیش کے لیے پولیس کے حوالے کر دیا۔
یاد رہے کہ 19 جولائی کو بلوچستان کے نواحی علاقے ڈگاری میں بانو ستکزئی اور احسان اللہ سمالانی کو کاروکاری کے الزام میں فائرنگ کرکے قتل کیا گیا۔ دردناک واقعے کی ویڈیو سوشل میڈیا پر وائرل ہوئی جس میں دیکھا گیا کہ دونوں کو کھلے میدان میں گولیوں کا نشانہ بنایا گیا۔
رپورٹس کے مطابق مقتولین میاں بیوی تھے اور ڈیڑھ سال سے روپوش تھے۔ انہیں مبینہ طور پر جرگے کے ذریعے بلایا گیا، قتل کا فیصلہ سنایا گیا اور بعد ازاں فائرنگ کر کے قتل کر دیا گیا۔
واقعے کا نوٹس وزیراعلیٰ بلوچستان سردار سرفراز بگٹی نے لیا، جس کے بعد پولیس متحرک ہوئی۔ مقدمہ ہنہ اوڑک تھانے میں درج ہوا اور پولیس نے سردار شیر باز ستکزئی، ان کے چار بھائیوں، دو محافظوں اور دیگر ملزمان سمیت مرکزی کردار بشیر احمد کو گرفتار کر لیا۔
مدعی کے مطابق، قتل کی سازش اور عمل میں مبینہ طور پر 25 سے زائد افراد ملوث تھے جن میں شاہ وزیر، جلال، ٹکری منیر، بختیار، ملک امیر، عجب خان، جان محمد اور دیگر نامعلوم افراد شامل ہیں۔
Comments 1