امریکا نے پاکستان کے ایف-16 طیاروں کے لیے 686 ملین ڈالر مالیت کے جدید اپ گریڈ پیکیج کی منظوری دے دی ہے، جس میں Link-16 سسٹمز، کرپٹو آلات، ایویونکس اپ گریڈ، تربیت اور لاجسٹک سپورٹ شامل ہیں۔ ڈی ایس سی اے کے مطابق یہ فروخت پاکستان کے ایف-16 بیڑے کو جدید بنانے، اس کی حفاظت بہتر کرنے اور اس کی سروس لائف 2040 تک بڑھانے میں مدد دے گی۔
بنگلہ دیش نے پہلی بار سرکاری سطح پر اعتراف کیا ہے کہ اسٹریٹجک طور پر ڈھاکا کے لیے پاکستان کے ساتھ ایسا علاقائی اتحاد ممکن ہے جس میں بھارت شامل نہ ہو، جب کہ نیپال اور بھوٹان اس طرح کی کسی گروپنگ کا حصہ بن ہی نہیں سکتے۔ بنگلہ دیش کے مشیر خارجہ محمد توحید حسین کے مطابق پاکستان، چین اور بنگلہ دیش پر مبنی تین ملکی پیش رفت ممکن ہے، جیسا کہ وزیر خارجہ اسحٰق ڈار نے اسلام آباد میں حالیہ بیان میں اشارہ دیا تھا۔
پاکستان نے اقوامِ متحدہ کی سلامتی کونسل کو خبردار کیا ہے کہ افغانستان کی سرزمین سے جنم لینے والی دہشت گردی پاکستان کی قومی سلامتی، خود مختاری اور خطے کے امن کے لیے سب سے بڑا خطرہ بن چکی ہے۔ اقوام متحدہ میں پاکستان کے مستقل مندوب عاصم افتخار نے کہا کہ افغان سرزمین دہشت گرد گروہوں کی محفوظ پناہ گاہ بن چکی ہے اور 2022 سے اب تک افغانستان سے ہونے والے حملوں میں پاکستانی شہریوں اور سیکیورٹی فورسز کی 1200 سے زائد جانیں ضائع ہو چکی ہیں۔
وزیر اعظم محمد شہباز شریف نے کہا ہے کہ افواجِ پاکستان کی قربانیوں کا مذاق اڑانے اور ان کے خلاف پروپیگنڈا کسی صورت برداشت نہیں کیا جائے گا۔ اسلام آباد میں قومی علما کنونشن سے خطاب کرتے ہوئے انہوں نے کہا کہ افواجِ پاکستان نے اپنے لہو سے تاریخ رقم کی اور دشمن کو ایسی شکست دی جو قیامت تک یاد رکھی جائے گی۔ وزیر اعظم نے قومی یکجہتی، فرقہ واریت کے خاتمے اور ملک کی سلامتی کے لیے علما کے کردار کو انتہائی اہم قرار دیا۔
قومی علماء مشائخ کانفرنس سے خطاب کرتے ہوئے فیلڈ مارشل سید عاصم منیر نے کہا کہ ریاستِ طیبہ اور ریاستِ پاکستان کا تعلق روحانی و نظریاتی بنیادوں پر قائم ہے۔ انہوں نے واضح کیا کہ اللہ نے تمام مسلم ممالک میں سے محافظینِ حرمین کا شرف پاکستان کو عطا کیا ہے۔ دہشتگردی کو بھارت کا وطیرہ قرار دیتے ہوئے انہوں نے کہا کہ پاکستان دشمن کو للکار کر جواب دیتا ہے۔
لاہور ہائیکورٹ نے بسنت آرڈیننس پر فوری عمل درآمد کی معطلی کی استدعا مسترد کرتے ہوئے حکومت سے 22 دسمبر تک سیفٹی اقدامات سے متعلق رپورٹ طلب کرلی۔ عدالت نے واضح کیا کہ پتنگ بازی عالمی ثقافت ہے مگر شہریوں کی جانوں کی حفاظت اولین ترجیح ہے۔
لاہور میں 25 سال بعد بسنت لاہور 2025 منانے کی منظوری دے دی گئی ہے۔ وزیراعلیٰ پنجاب مریم نواز نے 6، 7 اور 8 فروری کو تین روزہ بسنت فیسٹیول کے انعقاد کی حتمی منظوری دے دی جبکہ بسنت آرڈیننس 2025 پر سختی سے عملدرآمد کا فیصلہ کیا گیا ہے۔
الیکشن کمیشن آف پاکستان نے وزیراعلیٰ بلوچستان میر سرفراز بگٹی کی جانب سے کوئٹہ میں بلدیاتی انتخابات ملتوی کرنے کی درخواست مسترد کرتے ہوئے واضح کر دیا ہے کہ پولنگ 28 دسمبر کو مقررہ شیڈول کے مطابق ہی ہوگی۔ کمیشن نے سیکیورٹی کے فول پروف انتظامات، ووٹرز اور پولنگ عملے کے تحفظ اور پُرامن انتخابات یقینی بنانے کی ہدایات جاری کر دی ہیں، جبکہ رکن الیکشن کمیشن بلوچستان نے موسم اور امن و امان کی بنیاد پر اختلافی نوٹ تحریر کیا ہے۔
اسلام آباد میں پاکستان کے آرمی چیف و چیف آف ڈیفنس فورسز فیلڈ مارشل سید عاصم منیر اور دورہ پاکستان پر آئے ہوئے جمہوریہ انڈونیشیا کے صدر پرابوو سوبیانتو کے درمیان اہم ملاقات ہوئی۔ ملاقات میں علاقائی سلامتی، دفاعی تعاون، فوجی تربیت، انسداد دہشت گردی اور دونوں ممالک کی مسلح افواج کے درمیان تعلقات کو مزید مضبوط بنانے پر تبادلہ خیال کیا گیا۔ صدر انڈونیشیا نے پاکستان کی مسلح افواج کی پیشہ وارانہ صلاحیتوں اور علاقائی امن کے لیے کردار کو سراہا۔
انڈونیشیا کے صدر کی وزیراعظم ہاؤس آمد پر خصوصی استقبالیہ اور گارڈ آف آنر پیش کیا گیا۔
