کراچی کنگز نے پاکستان سپر لیگ (پی ایس ایل) کے ساتھ اپنا فرنچائز معاہدہ 10 سال کے لیے تجدید کر لیا۔ لیگ اور ٹیم دونوں نے اس معاہدے کو پی ایس ایل کی مضبوطی اور وقار میں اضافے کا اہم قدم قرار دیا ہے۔
ڈی جی آئی ایس پی آر لیفٹننٹ جنرل احمد شریف چوہدری نے غیر رسمی گفتگو میں کہا کہ سابق ڈی جی آئی ایس آئی لیفٹننٹ جنرل (ر) فیض حمید کے خلاف کورٹ مارشل کی کارروائی جاری ہے، اور یہ مکمل طور پر قانونی و عدالتی عمل ہے، اس لیے اس معاملے پر قیاس آرائیوں سے گریز کیا جائے۔ انہوں نے واضح کیا کہ پاکستان نے گزشتہ شب افغانستان میں کوئی کارروائی نہیں کی، اور پاکستان جب بھی کوئی آپریشن کرتا ہے تو باقاعدہ اعلان کرکے کرتا ہے۔ ترجمان نے کہا کہ پاکستان کبھی سویلین آبادی کو نشانہ نہیں بناتا، مسئلہ افغان عوام سے نہیں بلکہ افغان عبوری حکومت کی جانب سے دہشت گردوں کے خلاف غیر مؤثر کارروائی سے ہے۔
وفاقی آئینی عدالت نے پریکٹس اینڈ پروسیجر ترمیمی آرڈیننس کے خلاف دائر اپیل پر حکومت کو نوٹس جاری کر دیا ہے۔ جسٹس عامر فاروق کی سربراہی میں 5 رکنی لارجر بینچ نے سماعت کے دوران بینچ کی تشکیل اور اپیل کی نوعیت پر اہم سوالات اٹھائے۔ سماعت کے دوران وکیل سمیر کھوسہ نے مؤقف اختیار کیا کہ سپریم کورٹ کا 7 رکنی بینچ پہلے ہی اس معاملے پر ابتدائی فیصلہ دے چکا ہے، اس لیے موجودہ اپیل صرف لارجر بینچ ہی سن سکتا ہے۔
خیبر پختونخوا کے ضلع بنوں میں سیکیورٹی فورسز نے انٹیلی جنس بنیاد پر کامیاب آپریشن (آئی بی او) کرتے ہوئے بھارتی اسپانسرڈ فتنۃ الخوارج کے 22 دہشت گرد ہلاک کر دیے۔ آئی ایس پی آر کے مطابق یہ کارروائی اس اطلاع پر کی گئی کہ بھارتی پراکسی خوارج علاقے میں موجود ہیں۔ شدید فائرنگ کے تبادلے کے بعد سیکیورٹی فورسز نے ٹھکانے کو مؤثر انداز میں نشانہ بنایا۔
اسلام آباد میں وزیراعظم شہباز شریف اور سعودی چیف آف جنرل اسٹاف جنرل فیاض بن حمید الرویلی کے درمیان اہم ملاقات ہوئی، جس میں اقتصادی، دفاعی اور سیکیورٹی تعاون کو مزید مضبوط بنانے پر اتفاق کیا گیا۔ ملاقات میں آرمی چیف فیلڈ مارشل عاصم منیر بھی موجود تھے۔ دونوں ممالک نے دہشت گردی کے خاتمے اور علاقائی استحکام کے لیے مشترکہ عزم کا اعادہ کیا۔
اسلام آباد میں وزارت اطلاعات کے سینئر افسر اشفاق احمد خلیل کو وفاقی سیکرٹری اطلاعات و نشریات کے عہدے پر تعینات کر دیا گیا ہے۔ اشفاق احمد خلیل اس سے قبل وزارت اطلاعات میں ایڈیشنل سیکرٹری کے طور پر خدمات سرانجام دے رہے تھے جبکہ وہ مختلف اہم ذمہ داریوں پر بھی فائز رہے ہیں۔ ان میں پریس انفارمیشن ڈیپارٹمنٹ (پی آئی ڈی) پشاور میں ڈائریکٹر جنرل، جاپان میں پاکستانی سفارتخانے میں پریس قونصلر، ڈائریکٹوریٹ آف الیکٹرانک میڈیا اینڈ پبلی کیشنز، پیمرا، انفارمیشن سروس اکیڈمی اور پی آئی ڈی کے اہم عہدے شامل ہیں۔
پشاور میں فیڈرل کانسٹیبلری ہیڈکوارٹر پر ہونے والے دہشت گرد حملے کی وزیراعظم محمد شہباز شریف اور صدرِ مملکت آصف علی زرداری نے شدید مذمت کی ہے۔ وزیر اعظم نے زخمیوں کو فوری طبی امداد فراہم کرنے کی ہدایت کرتے ہوئے کہا کہ سیکیورٹی فورسز کی بروقت اور جرات مندانہ کارروائی نے بڑے سانحے سے بچا لیا۔ انہوں نے اس بات پر زور دیا کہ واقعے کے ذمہ دار عناصر کی جلد از جلد نشاندہی کر کے انہیں قانون کے کٹہرے میں لایا جائے۔ وزیراعظم نے واضح کیا کہ حکومت پاکستان دہشت گردی کے مکمل خاتمے کے لیے پرعزم ہے اور ایسے حملے پاکستان کی سالمیت کو نقصان پہنچانے کی ناکام کوشش ہیں۔
سعودی چیف آف جنرل اسٹاف جنرل فیاض الرویلی نے جی ایچ کیو میں جنرل عاصم منیر سے ملاقات کی، جس میں دفاعی تعاون، اسٹریٹیجک شراکت داری، انسداد دہشت گردی اور سیکیورٹی تعاون کے فروغ پر بات چیت ہوئی۔ وفد نے یادگارِ شہداء پر پھول بھی چڑھائے۔
میئر کراچی مرتضیٰ وہاب نے اعلان کیا ہے کہ گرین لائن کوریڈور 31 اکتوبر 2026 تک کھول دیا جائے گا۔ انہوں نے کہا کہ منصوبہ شروع کرتے وقت کے ایم سی کو اعتماد میں نہیں لیا گیا تھا، لیکن اب مشترکہ طور پر کام کر کے تمام مسائل حل کیے جا رہے ہیں، جبکہ ریڈ لائن منصوبے پر بھی جلد کام شروع ہوگا۔
جنرل ساحر شمشاد مرزا چیئرمین جوائنٹ چیفس آف اسٹاف کمیٹی کے آخری سربراہ رہے، عہدہ 27ویں ترمیم کے بعد ختم کر دیا گیا۔
