پاکستان اور سعودی عرب تعلقات مزید مضبوط بنانے پر اتفاق، وزیراعظم اور سعودی عسکری قیادت کی اہم ملاقات، دہشت گردی اور انتہا پسندی کے خاتمے، اور خطے میں امن و استحکام کے فروغ کا عزم
اسلام آباد (رئیس الاخبار) :— وزیراعظم شہباز شریف نے کہا ہے کہ پاکستان اور سعودی عرب کے درمیان اقتصادی، دفاعی اور سیکیورٹی سمیت ہر شعبے میں تاریخی برادرانہ تعلقات کو مزید مضبوط بنایا جائے گا۔ انہوں نے یہ عزم اسلام آباد میں سعودی مسلح افواج کے چیف آف جنرل اسٹاف جنرل فیاض بن حمید الرویلی سے ملاقات کے دوران ظاہر کیا۔
وزیراعظم اور سعودی عسکری قیادت کی اہم ملاقات میں آرمی چیف فیلڈ مارشل سید عاصم منیر اور نائب وزیراعظم اسحٰق ڈار بھی موجود تھے۔ وزیراعظم نے سعودی مہمان کا خیرمقدم کرتے ہوئے کہا کہ پاکستان سعودی عرب کی "ہر وقت فراہم کی جانے والی غیر متزلزل حمایت” کو قدر کی نگاہ سے دیکھتا ہے۔
تعلقات کا محور: مشترکہ عقیدہ، اقدار اور اعتماد
وزیراعظم شہباز شریف نے کہا کہ پاکستان اور سعودی عرب کے تعلقات مشترکہ عقیدے، یکساں اقدار اور باہمی اعتماد پر مبنی ہیں۔ انہوں نے اپنے گزشتہ دو ماہ کے ریاض کے کامیاب دوروں کا ذکر کرتے ہوئے بتایا کہ ان دوروں کے دوران تاریخی اسٹریٹجک دفاعی معاہدوں پر دستخط ہوئے، جو دونوں ممالک کے تعاون کو نئی وسعت دے رہے ہیں۔
وزیراعظم نے ہر قسم کی دہشت گردی اور انتہا پسندی کے خاتمے، اور خطے میں امن و استحکام کے فروغ کے لیے پاکستان–سعودی مشترکہ عزم کو بھی اجاگر کیا۔
سعودی قیادت کا پیغام اور عزم
جنرل فیاض الرویلی نے سعودی قیادت کی جانب سے وزیراعظم اور پاکستانی عوام کے لیے نیک تمناؤں کا پیغام پہنچایا۔ انہوں نے کہا کہ سعودی عرب پاکستان کے ساتھ موجودہ بہترین دفاعی اور تزویراتی شراکت داری کو نئی بلندیوں تک لے جانے کے لیے پُرعزم ہے۔
سعودی اور پاکستانی عسکری قیادت کی جی ایچ کیو میں ملاقات
وزیراعظم اور سعودی عسکری قیادت کی اہم ملاقات سے قبل جنرل فیاض الرویلی نے جی ایچ کیو راولپنڈی میں آرمی چیف فیلڈ مارشل عاصم منیر سے بھی ملاقات کی تھی۔ آئی ایس پی آر کے مطابق دونوں رہنماؤں نے دفاع، سیکیورٹی اور انسدادِ دہشت گردی کے شعبوں میں دیرینہ اور اسٹریٹجک تعاون کو مزید مضبوط بنانے پر تبادلہ خیال کیا۔
آئی ایس پی آر کا کہنا ہے کہ ملاقات میں باہمی دلچسپی کے امور پر گفتگو ہوئی اور دونوں ممالک نے عسکری شراکت داری کو مزید مؤثر بنانے پر اتفاق کیا۔
Islamabad : H.E. General Fayyad bin Hamed Al-Ruwaili, Chief of General Staff of the Armed Forces of the Kingdom of Saudi Arabia calls on Prime Minister Muhammad Shehbaz Sharif. pic.twitter.com/hTiLv5x2GX
— Government of Pakistan (@GovtofPakistan) November 24, 2025
