ڈوگر ویلفیئر ٹرسٹ کا فری آئی میڈیکل کیمپ، مفت معائنہ، ادویات اور موتیا کے کامیاب آپریشن
ڈوگر ویلفیئر ٹرسٹ کے زیرِ اہتمام رمضان آرائیں میموریل فری آئی میڈیکل کیمپ مہر ہاؤس، نزد گرلز ہائیر سیکنڈری اسکول، چک نمبر 232 ر-ب باوے والا، فیصل آباد میں کامیابی کے ساتھ منعقد ہوا، جہاں علاقے کے درجنوں مستحق اور نادار مریضوں نے آنکھوں کے مفت معائنے، علاج، ادویات اور آپریشن کی سہولت سے بھرپور استفادہ کیا۔ اس فلاحی اقدام کو علاقہ مکینوں کی جانب سے بے حد سراہا گیا اور اسے خدمتِ انسانیت کی بہترین مثال قرار دیا گیا۔
فری آئی کیمپ میں معروف ماہرِ امراضِ چشم ڈاکٹر خالد محمود ڈوگر (آئی اسپیشلسٹ) نے اپنی تجربہ کار اور پیشہ ور ٹیم کے ہمراہ خدمات سرانجام دیں۔ ڈاکٹر خالد محمود ڈوگر نے مریضوں کا تفصیلی معائنہ کیا اور آنکھوں کی مختلف بیماریوں کی بروقت تشخیص کی۔ انہوں نے مریضوں اور ان کے اہلِ خانہ کو آنکھوں کی حفاظت، احتیاطی تدابیر، بروقت علاج اور جدید طبی سہولیات کی اہمیت سے بھی آگاہ کیا۔
کیمپ کے دوران مریضوں کو مفت آئی ڈراپس، ادویات اور طبی مشورے فراہم کیے گئے، جبکہ کمزور بینائی کے شکار افراد کو دور اور نزدیک دیکھنے کے لیے عینک کے درست استعمال، آنکھوں کی ورزش اور روزمرہ احتیاطی تدابیر کے حوالے سے مکمل رہنمائی دی گئی۔ متعدد مریضوں میں سفید موتیا اور کالا موتیا کی تشخیص کی گئی، جنہیں بیماری کی نوعیت، علاج کے مراحل اور آپریشن کے بارے میں تفصیل سے آگاہ کیا گیا۔
جن مریضوں کو فوری آپریشن کی ضرورت تھی، انہیں ڈوگر ویلفیئر ٹرسٹ کے زیرِ اہتمام قائم آپریشن تھیٹر منتقل کیا گیا، جہاں بالکل مفت کامیاب آپریشن کیے گئے اور جدید لینز ڈالے گئے۔ ان آپریشنز کے نتیجے میں کئی مریضوں کی بینائی بحال ہوئی، جس پر مریضوں اور ان کے اہلِ خانہ نے اللہ تعالیٰ کا شکر ادا کرتے ہوئے منتظمین اور ڈاکٹروں کے لیے دعائیں کیں۔
اس مثالی فلاحی سرگرمی کے انعقاد میں میاں ذوالفقار علی (مقیم لندن) نے کلیدی اور نمایاں کردار ادا کیا۔ انہوں نے نہ صرف فری آئی کیمپ کے تمام اخراجات برداشت کیے بلکہ سی سی ٹی وی کیمروں کے ذریعے کیمپ کے انتظامات کی مسلسل نگرانی بھی کرتے رہے تاکہ ہر مرحلہ شفاف، منظم اور بہتر انداز میں مکمل ہو۔ ان کے اس جذبۂ خدمت کو حاضرین نے دل کی گہرائیوں سے سراہا۔
میاں ذوالفقار علی کے والد مہر محمد صدیق اور بھائی صوبیدار (ر) میاں غلام مصطفیٰ نے کیمپ کی میزبانی اور انتظامی امور میں بھرپور تعاون فراہم کیا۔ اہلِ خانہ نے مہمان نوازی، نظم و ضبط اور مریضوں کی سہولت کو یقینی بنانے میں مثالی کردار ادا کیا، جس کے باعث کیمپ ایک خوشگوار اور منظم ماحول میں منعقد ہوا۔
کیمپ کی کامیابی میں میاں غلام مرتضیٰ کی انتظامی خدمات نہایت قابلِ ذکر رہیں۔ انہوں نے رجسٹریشن، مریضوں کی قطار بندی، رہنمائی، ڈاکٹرز اور عملے کے درمیان ہم آہنگی اور مجموعی نظم و ضبط کو نہایت مؤثر انداز میں سنبھالا۔ ان کی انتھک محنت اور حسنِ انتظام کے باعث فری آئی کیمپ نہایت خوش اسلوبی سے اختتام پذیر ہوا۔
فری آئی کیمپ اور کامیاب آپریشنز کے بعد میاں ذوالفقار علی، میاں شہریار علی اور میاں فارم ہاؤس کی انتظامیہ کی جانب سے مریضوں کو بحفاظت ان کے گھروں تک پہنچانے کا خصوصی انتظام بھی کیا گیا، جسے مریضوں اور ان کے اہلِ خانہ نے بے حد سراہا اور منتظمین کے لیے دعاؤں کا اظہار کیا۔
اس موقع پر فرحان پبلک اسکول مظفر کالونی کے پرنسپل میاں محمد عارف محمود، سماجی کارکن میاں ارسلان مصطفیٰ، محمد شفیق ڈوگر، محمد شوکت ڈوگر، مہر طارق محمود، میاں فرقان، میاں دانش، میاں عبداللہ عارف، میاں سمیع اللہ، میاں عبیداللہ، میاں زیان ارسلان اور میاں عبدالاحد سمیت دیگر افراد نے بھی رضاکارانہ خدمات انجام دیں اور مریضوں کی خدمت کو اپنا اعزاز قرار دیا۔
سابق پرنسپل سرگودھا میڈیکل کالج ڈاکٹر ظہور الحسن ڈوگر نے خصوصی طور پر کیمپ کا دورہ کیا اور ڈوگر ویلفیئر ٹرسٹ، مہر ہاؤس اور تمام منتظمین کو مستحق مریضوں کے مفت علاج، بہترین انتظامات اور موتیا کے کامیاب آپریشنز پر دل کی گہرائیوں سے مبارکباد پیش کی۔ انہوں نے کہا کہ ایسے فلاحی اقدامات معاشرے میں امید، اعتماد اور بھائی چارے کو فروغ دیتے ہیں۔
اس موقع پر ڈاکٹر خالد محمود ڈوگر نے اپنے خیالات کا اظہار کرتے ہوئے کہا کہ وہ ڈوگر ویلفیئر ٹرسٹ کے پلیٹ فارم سے ملک بھر میں متعدد فری آئی میڈیکل کیمپس میں خدمات انجام دے چکے ہیں اور خدمتِ انسانیت کا یہ مشن آئندہ بھی پوری لگن، اخلاص اور جذبے کے ساتھ جاری رہے گا۔ انہوں نے مخیر حضرات سے اپیل کی کہ وہ بھی ایسے فلاحی کاموں میں آگے بڑھ کر حصہ لیں۔
علاقہ مکینوں نے ڈوگر ویلفیئر ٹرسٹ، میاں ذوالفقار علی، ان کے اہلِ خانہ، میاں غلام مرتضیٰ اور تمام منتظمین کا شکریہ ادا کرتے ہوئے کہا کہ مہر ہاؤس فری آئی کیمپ کے انعقاد کے لیے ایک بہترین مقام ثابت ہوا اور تمام انتظامی امور نہایت مثالی انداز میں سرانجام دیے گئے۔
