الیکشن کمیشن نے اسلام آباد میں بلدیاتی انتخابات کا شیڈول واپس لے لیا
الیکشن کمیشن آف پاکستان نے وفاقی دارالحکومت اسلام آباد میں بلدیاتی انتخابات کا جاری کردہ شیڈول واپس لے لیا ہے۔ اس حوالے سے الیکشن کمیشن کی جانب سے باقاعدہ نوٹیفکیشن جاری کر دیا گیا ہے۔
نوٹیفکیشن کے مطابق حکومت نے 10 جنوری کو اسلام آباد کے لیے بلدیاتی حکومت ترمیمی آرڈیننس جاری کیا تھا، جس کے تحت وفاقی دارالحکومت میں مقامی حکومت کے ڈھانچے میں نمایاں تبدیلیاں کی گئی ہیں۔ ترمیمی آرڈیننس کے نتیجے میں نہ صرف بلدیاتی نظام کی ساخت تبدیل کی گئی بلکہ مقامی حکومتوں کے انتخابات کے طریقہ کار یعنی موڈ میں بھی رد و بدل کیا گیا ہے۔
الیکشن کمیشن نے اپنے نوٹیفکیشن میں واضح کیا ہے کہ مقامی حکومتوں کے انتخابات کے موڈ میں تبدیلی کے باعث موجودہ حالات میں بلدیاتی انتخابات کا انعقاد ممکن نہیں رہا، اسی لیے اسلام آباد میں مقامی حکومتوں کے انتخابات کا پہلے سے جاری کردہ پروگرام واپس لینے کا فیصلہ کیا گیا ہے۔
واضح رہے کہ الیکشن کمیشن آف پاکستان نے اس سے قبل وفاقی دارالحکومت میں بلدیاتی انتخابات کے انعقاد کے لیے 15 فروری کی تاریخ کا اعلان کیا تھا اور انتخابی شیڈول بھی جاری کر دیا گیا تھا۔ تاہم حکومت کی جانب سے نئے ترمیمی آرڈیننس کے نفاذ کے بعد انتخابی عمل متاثر ہوا، جس پر الیکشن کمیشن نے قانونی تقاضوں کے تحت یہ اقدام اٹھایا ہے۔
الیکشن کمیشن کا کہنا ہے کہ آئینی اور قانونی ذمہ داریوں کے مطابق شفاف اور منصفانہ انتخابات کا انعقاد اس کی اولین ترجیح ہے، اور جب تک مقامی حکومتوں کے نظام سے متعلق قانونی صورتحال واضح نہیں ہو جاتی، اس وقت تک انتخابات کا انعقاد ممکن نہیں ہوگا۔ مزید کہا گیا ہے کہ آئندہ صورتحال کا جائزہ لینے کے بعد نیا شیڈول مناسب وقت پر جاری کیا جائے گا۔
سیاسی اور عوامی حلقوں کی جانب سے اس فیصلے پر مختلف ردعمل سامنے آ رہے ہیں، جبکہ شہریوں کا کہنا ہے کہ بلدیاتی انتخابات میں تاخیر سے مقامی سطح پر مسائل کے حل کا عمل مزید متاثر ہو سکتا ہے۔
