راولپنڈی: توشہ خانہ ٹو کیس کی سماعت کے بعد اڈیالہ جیل میں قید سابق وزیراعظم اور پی ٹی آئی کے بانی عمران خان کی بالآخر اپنے بیٹوں قاسم اور سلیمان خان سے ٹیلیفون پر بات کروا دی گئی۔
آج کی سماعت اسپیشل جج سینٹرل شاہ رخ ارجمند کی عدالت میں ہوئی، جس میں عمران خان اور ان کی اہلیہ بشریٰ بی بی کو کمرہ عدالت میں پیش کیا گیا۔ دوران سماعت نیب افسر آفتاب احمد نے اپنا بیان قلمبند کرایا۔ بشریٰ بی بی کے وکیل ارشد تبریز نے گواہ پر جرح مکمل کر لی، جبکہ عمران خان کے وکیل قوسین مفتی آئندہ سماعت پر جرح کریں گے۔
عدالت نے مزید کارروائی کے لیے دو گواہان، رابعہ اور ثنا کو بھی 6 اگست کی آئندہ تاریخ پر طلب کر لیا۔
یاد رہے کہ جولائی 2024 میں عمران خان نے اڈیالہ جیل میں بیٹوں سے ٹیلیفونک بات چیت نہ ہونے پر درخواست دائر کی تھی۔ اس معاملے پر انسداد دہشتگردی عدالت کے جج ملک اعجاز آصف نے جیل انتظامیہ کو نوٹس جاری کیا تھا اور 3 جولائی تک جواب طلب کیا تھا۔
بعد ازاں عدالت نے عمران خان کو بیٹوں سے فون پر بات کرنے کی اجازت دینے کا فیصلہ سنایا تھا، جس پر آج پہلی بار عملدرآمد ہوا۔
