صائم ایوب ایک بار پھر ٹی ٹوئنٹی آل راؤنڈر رینکنگ میں نمبر ون، پاکستانی کھلاڑیوں کی شاندار ترقی، کپتان سلمان علی آغا نے بارہ درجے ترقی کے ساتھ انتیسویں پوزیشن حاصل کر لی ہے
اسلام آباد: پاکستان کے اوپنر صائم ایوب نے آسٹریلیا کے خلاف شاندار آل راؤنڈ کارکردگی کی بدولت مینز ٹی ٹوئنٹی آل راؤنڈر رینکنگ میں ایک بار پھر پہلی پوزیشن حاصل کر لی ہے۔
انٹرنیشنل کرکٹ کونسل (آئی سی سی) کی جانب سے جاری کردہ تازہ رینکنگ کے مطابق 23 سالہ صائم ایوب نے زمبابوے کے تجربہ کار آل راؤنڈر سکندر رضا کو پیچھے چھوڑ دیا ہے۔
صائم ایوب نے آسٹریلیا کے خلاف ٹی ٹوئنٹی سیریز میں بیٹنگ اور بولنگ دونوں شعبوں میں شاندار کارکردگی کا مظاہرہ کیا، جہاں انہوں نے 119 رنز اسکور کیے جبکہ تین اہم وکٹیں بھی حاصل کیں، جس کی بدولت وہ دوبارہ عالمی نمبر ون آل راؤنڈر بن گئے۔
تازہ آئی سی سی رینکنگ میں پاکستان کے دیگر کھلاڑیوں کو بھی نمایاں فائدہ ہوا ہے۔ قومی ٹیم کے اسپنر ابرار احمد دو درجے بہتری کے بعد ٹی ٹوئنٹی بولرز کی فہرست میں دوسرے نمبر پر آ گئے ہیں اور وہ پہلی پوزیشن سے صرف 28 ریٹنگ پوائنٹس پیچھے ہیں۔
آل راؤنڈر محمد نواز نے بھی آسٹریلیا کے خلاف سیریز میں پانچ وکٹیں حاصل کرنے کے بعد آٹھ درجے ترقی پاتے ہوئے ٹی ٹوئنٹی بولرز کی فہرست میں ساتویں پوزیشن حاصل کر لی ہے، جبکہ آل راؤنڈرز کی فہرست میں بھی ایک درجے بہتری کے بعد وہ چوتھی پوزیشن پر پہنچ گئے ہیں۔
قومی ٹیم کے فاسٹ بولر شاہین شاہ آفریدی نے بھی شاندار کارکردگی کی بدولت پانچ درجے ترقی حاصل کی اور اب وہ ٹی ٹوئنٹی بولرز کی فہرست میں انیسویں نمبر پر آ گئے ہیں۔
بیٹنگ رینکنگ میں بھی پاکستانی کھلاڑیوں نے نمایاں پیش رفت کی ہے۔ صائم ایوب آٹھ درجے ترقی کے بعد ستائیسویں نمبر پر پہنچ گئے ہیں، جبکہ کپتان سلمان علی آغا نے بارہ درجے ترقی کے ساتھ انتیسویں پوزیشن حاصل کر لی ہے۔
تاہم، صاحبزادہ فرحان آسٹریلیا کے خلاف سیریز میں خاطر خواہ کارکردگی نہ دکھا سکے، جس کے باعث وہ دو درجے تنزلی کے بعد ساتویں پوزیشن پر چلے گئے ہیں۔
Major confidence boost for Pakistan all-rounder with the #T20WorldCup just around the corner 👊
More on the latest ICC Men's Player Rankings ⬇️https://t.co/IGtopFC3we
— ICC (@ICC) February 4, 2026
