پی آئی اے نجکاری میں دلچسپی رکھنے والے کاروباری شخصیات کی وزیر اعظم سے ملاقات، شفاف عمل اور لائیو بِڈنگ کا اعلان

پی آئی اے نجکاری میں دلچسپی رکھنے والے کاروباری شخصیات کی وزیر اعظم سے ملاقات۔ نجکاری کے شفاف عمل اور لائیو بِڈنگ کا اعلان

اسلام آباد(رئیس الاخبار) :— وزیرِ اعظم شہباز شریف نے کہا ہے کہ پاکستان انٹرنیشنل ایئر لائنز (پی آئی اے) کی نجکاری مکمل شفافیت، میرٹ اور بین الاقوامی معیار کے مطابق کی جا رہی ہے، اور اس اہم عمل کی بِڈنگ 23 دسمبر 2025 کو ملک بھر کے تمام ٹی وی چینلز پر براہ راست نشر کی جائے گی۔

پی آئی اے کی نجکاری میں دلچسپی رکھنے والی کاروباری شخصیات اور کمپنیوں کے وفد نے وزیرِ اعظم سے ملاقات کی۔ اس موقع پر شہباز شریف کا کہنا تھا کہ حکومت پی آئی اے کا کھویا ہوا تشخص بحال کرنے کے لیے اقدامات کر رہی ہے، اور قومی ایئر لائن کو دوبارہ ایک مضبوط، جدید اور منافع بخش ادارہ بنانے کا ہدف رکھتی ہے۔

وزیرِ اعظم نے کہا کہ پی آئی اے کی دنیا بھر میں پروازوں کی بحالی سمندر پار پاکستانیوں کے لیے بڑی سہولت ثابت ہوگی جبکہ پاکستان کے سیاحتی اور معاشی شعبے کی ترقی کے لیے بھی قومی ایئر لائن کا جدید تقاضوں کے مطابق ہونا لازمی ہے۔ انہوں نے کہا کہ ہم پر امید ہیں کہ نجکاری کے بعد پی آئی اے دوبارہ ’’گریٹ پیپل ٹو فلائی وِد‘‘ کی اپنی روایات پر پورا اترے گی۔

کاروباری شخصیات کی وزیر اعظم سے ملاقات میں وفد نے نجکاری کے عمل، ممکنہ سرمایہ کاری اور آئندہ حکمت عملی پر اپنی آراء بھی پیش کیں۔ شہباز شریف نے اس موقع پر کہا کہ حکومت شفافیت کے اصول سے ایک قدم بھی پیچھے نہیں ہٹے گی اور فیصلہ کن مرحلے میں میرٹ کو ہی ترجیح دی جائے گی۔

کاروباری شخصیات کی وزیر اعظم سے ملاقات کے اجلاس میں وفاقی وزراء اسحٰق ڈار، احد چیمہ، محمد اورنگزیب، عطاء اللہ تارڑ، اعظم نذیر تارڑ، اویس لغاری، وزیرِ مملکت بلال اظہر کیانی، مشیر محمد علی، معاون خصوصی ہارون اختر اور متعلقہ حکومتی عہدیدار بھی شریک ہوئے۔

واضح رہے کہ پی آئی اے کی نجکاری کے حوالے سے یہ سب سے اہم پیش رفت ہے، کیونکہ پہلی بار بِڈنگ لائیو نشر کی جائے گی جو شفافیت کے حکومتی دعوے کو مزید تقویت دیتی ہے۔

Prime Minister Muhammad Shehbaz Sharif meets PIA's bidders. pic.twitter.com/l2hcZLMGIZ
— Government of Pakistan (@GovtofPakistan) December 3, 2025