ترجمان دفتر خارجہ نے کہا ہے کہ بورڈ آف پیس کو ابراہام معاہدے سے جوڑنا غلط فہمی ہے۔ پاکستان نے غزہ میں جنگ بندی، تعمیر نو اور فلسطینی عوام کے حق خودارادیت کے لیے نیک نیتی سے بورڈ آف پیس میں شمولیت اختیار کی ہے، تاہم پاکستان ابراہام معاہدے کا حصہ نہیں بنے گا۔
چیئرمین سی ڈی اے کی زیر صدارت اجلاس میں اسلام آباد میں جدید، ڈیجیٹل اور ماحول دوست الیکٹرک ٹرام اور ای بس نظام متعارف کرانے کے لیے جلد فیزیبلٹی اسٹڈی کرانے کا فیصلہ کر لیا گیا۔
الیکشن کمیشن آف پاکستان نے جے یو آئی (ف) کی خواتین کی مخصوص نشست کے معاملے پر حتمی فیصلہ سناتے ہوئے حنا بی بی کی درخواست مسترد کر دی، جس کے بعد صدف احسان کی قومی اسمبلی کی رکنیت برقرار رہے گی۔
ریاستی اداروں پر مبینہ گمراہ کن الزامات کے کیس میں سیشن عدالت اسلام آباد نے وزیراعلیٰ خیبر پختونخوا سہیل آفریدی کے ناقابل ضمانت وارنٹ گرفتاری جاری کر دیے، عدالت نے عدم حاضری پر سخت مؤقف اختیار کر لیا۔
بلوچستان کے ضلع ڈیرہ بگٹی میں توانائی کے شعبے کے لیے خوشخبری سامنے آ گئی ہے، جہاں ماڑی انرجی لمیٹڈ نے تبری-ون کنویں سے قدرتی گیس کی کامیاب دریافت کا اعلان کیا ہے، جو ملکی توانائی بحران میں اہم کردار ادا کر سکتی ہے۔
قومی اسمبلی کی قائمہ کمیٹی برائے مذہبی امور نے وزارت مذہبی امور کو تحریری سفارشات ارسال کی ہیں کہ ہر سال بارہ ربیع الاول کے موقع پر دس رکنی پارلیمانی وفد کو سرکاری خرچ پر مدینہ منورہ اور مکہ مکرمہ بھیجا جائے تاکہ وفد روضۂ رسول ﷺ پر حاضری دے اور پاکستانی عوام کی جانب سے درود و سلام پیش کرے۔ وفد کے قیام، خوراک، رہائش، ٹرانسپورٹ اور طبی سہولتیں بھی سرکاری ذمہ ہوں گی۔
وزیر دفاع خواجہ آصف نے واضح کیا ہے کہ وادی تیراہ سے لوگوں کی نقل مکانی برفباری کے دوران ہر سال معمول کے مطابق ہوتی ہے اور اس کا کسی فوجی آپریشن سے کوئی تعلق نہیں۔ انہوں نے کہا کہ صوبائی حکومت اپنی ناکامیوں کا ملبہ وفاق پر ڈال رہی ہے، جبکہ جرگے اور حکومت کے درمیان معاملات طے پا چکے ہیں اور چار ارب روپے بھی مختص کیے گئے تھے۔
وفاقی حکومت نے بیرون ملک سے درآمد کی جانے والی گاڑیوں پر ڈیوٹی اور ٹیکس کے تعین کا نظام تبدیل کرتے ہوئے مقامی ایجنٹس کا کردار ختم کر دیا۔ ایف بی آر کی جانب سے جاری کسٹمز جنرل آرڈر کے تحت اب یورپ سے درآمدی گاڑیوں پر ٹیکس براہ راست سرکاری نظام کے تحت مقرر ہوگا، جس سے شفافیت میں اضافہ اور بدعنوانی کا خاتمہ ممکن ہو سکے گا۔
پیٹرولیم ڈویژن نے ملک بھر کے تمام پیٹرول پمپس پر آٹو میٹک ٹینک گیجنگ سسٹم لازمی طور پر نافذ کرنے کا فیصلہ کر لیا، 10 فروری کے بعد اے ٹی جی کے بغیر کسی پمپ کو اسٹوریج لائسنس جاری نہیں ہوگا۔
سندھ کابینہ نے سانحہ گل پلازہ میں شہید ہونے والے افراد کے اہلخانہ کو ایک کروڑ روپے فی کس معاوضہ دینے کی منظوری دے دی ہے، جبکہ متاثرہ دکانداروں کو پانچ لاکھ روپے فوری امداد اور ایک کروڑ روپے بلاسود قرض فراہم کرنے کا فیصلہ بھی کیا گیا ہے۔
