آرمی چیف فیلڈ مارشل عاصم منیر سے ایرانی قومی سلامتی کونسل کے سیکریٹری کی ملاقات، خطے کی سیکیورٹی صورتحال پر گفتگو،
راولپنڈی(رئیس الاخبار) :— آرمی چیف فیلڈ مارشل سید عاصم منیر سے ایرانی نیشنل سیکیورٹی کونسل کے سیکریٹری علی لاریجانی نے جنرل ہیڈکوارٹرز (جی ایچ کیو) میں ملاقات کی، جس میں خطے کی مجموعی سیکیورٹی صورتحال، دوطرفہ تعاون اور مشترکہ چیلنجز سے نمٹنے کے لیے اقدامات پر تفصیلی تبادلہ خیال کیا گیا۔
پاک فوج کے شعبۂ تعلقات عامہ (آئی ایس پی آر) کے مطابق عاصم منیر سے ایرانی قومی سلامتی کونسل کے سیکریٹری کی ملاقات میں دونوں ممالک کے درمیان سیکیورٹی تعاون کو مزید بڑھانے اور طویل المدتی استحکام کے لیے مشترکہ حکمت عملی اپنانے پر اتفاق کیا گیا۔ اس موقع پر پاکستان اور ایران کے درمیان رابطوں کے تسلسل اور اعتماد سازی کے اقدامات کی اہمیت پر بھی زور دیا گیا۔
ترجمان پاک فوج کے مطابق علی لاریجانی نے خطے میں جاری صورتحال خصوصاً جنگی حالات میں پاکستان کے کردار اور حمایت پر پاکستانی قوم کے لیے ایرانی سپریم لیڈر آیت اللہ علی خامنہ ای کا خصوصی پیغام اور سلام پہنچایا۔
فیلڈ مارشل عاصم منیر نے خطے میں پائیدار امن و استحکام کے لیے پاکستان کے عزم کا اعادہ کرتے ہوئے کہا کہ دہشتگردی کے خاتمے، سرحدی سیکیورٹی اور خطے کی ترقی کے لیے ایران کے ساتھ قریبی تعاون ناگزیر ہے۔ انہوں نے اس امید کا اظہار کیا کہ پاکستان اور ایران اجتماعی کوششوں کے ذریعے مشترکہ خطرات کا مؤثر انداز میں مقابلہ کر سکتے ہیں۔
ایرانی سیکریٹری نیشنل سیکیورٹی کونسل علی لاریجانی نے خطے میں امن و سلامتی کے لیے پاکستان کے مثبت کردار کو سراہتے ہوئے دوطرفہ تعلقات کو مزید وسعت دینے کے عزم کا اظہار کیا۔ انہوں نے کہا کہ علاقائی مسائل کے حل کے لیے مذاکرات، رابطوں میں اضافہ اور شراکت داری وقت کی اہم ضرورت ہے۔
آئی ایس پی آر کے مطابق عاصم منیر سے ایرانی قومی سلامتی کونسل کے سیکریٹری کی ملاقات میں دوطرفہ تعاون کے مختلف پہلوؤں، علاقائی چیلنجز اور مستقبل میں مشترکہ اقدامات کو مؤثر بنانے پر بھی تفصیلی گفتگو ہوئی۔
#ISPR
Rawalpindi, 26 November, 2025
Mr. Ali Ardeshir Larijani, Secretary of Supreme National Security Council of #Iran (NSA Iran), called on Field Marshal Syed Asim Munir, NI (M), HJ, Chief of Army Staff the (#COAS), #Pakistan Army at General Headquarters (GHQ), Rawalpindi.… pic.twitter.com/75UyspUN0p
— Pakistan Armed Forces News 🇵🇰 (@PakistanFauj) November 26, 2025
