وزیر اعظم شہباز شریف کا قومی علما کنونشن سے خطاب: افواج پاکستان کے خلاف پروپیگنڈا ناقابل برداشت ہے
وزیر اعظم محمد شہباز شریف نے کہا ہے کہ افواجِ پاکستان کی قربانیوں کا مذاق اڑانے اور ان کے خلاف پروپیگنڈا کسی صورت برداشت نہیں کیا جائے گا۔ اسلام آباد میں قومی علما کنونشن سے خطاب کرتے ہوئے انہوں نے کہا کہ افواجِ پاکستان نے اپنے لہو سے تاریخ رقم کی اور دشمن کو ایسی شکست دی جو قیامت تک یاد رکھی جائے گی۔ وزیر اعظم نے قومی یکجہتی، فرقہ واریت کے خاتمے اور ملک کی سلامتی کے لیے علما کے کردار کو انتہائی اہم قرار دیا۔
بانی پی ٹی آئی کو دوسری جیل منتقل کرنے پر غور کیا جا رہا ہے، اختیار ولی خان
اسلام آباد میں وزیراعظم کے کوآرڈینیٹر برائے اطلاعات و امورِ خیبرپختونخوا اختیار ولی خان نے کہا ہے کہ حکومت بانی پاکستان تحریک انصاف کو کسی اور صوبے کی جیل منتقل کرنے پر غور کر رہی ہے۔ ان کا کہنا تھا کہ اڈیالہ جیل کے باہر روزانہ احتجاج سے شہری شدید متاثر ہو رہے ہیں۔ انہوں نے پی ٹی آئی پر ملک میں عدم استحکام پھیلانے، ریاستی اداروں کو نشانہ بنانے اور نوجوانوں کو گمراہ کرنے کے الزامات بھی عائد کیے۔
ملک دشمن عناصر کے ساتھ گٹھ جوڑ بے نقاب، نورین نیازی نے بھارتی میڈیا پر پاکستان مخالف بیانیہ اپنایا، عطا اللہ تارڑ کی میڈیا سے گفتگو
وفاقی وزیر اطلاعات عطا اللہ تارڑ نے کہا ہے کہ پی ٹی آئی کا ملک دشمن عناصر کے ساتھ گٹھ جوڑ بے نقاب ہو چکا ہے اور ملک میں پھیلائی جانے والی افواہیں سازش کا حصہ ہیں۔ انہوں نے خیبر پختونخوا حکومت کی ناکامیوں، 9 مئی کے واقعات اور سیکیورٹی صورتحال پر بھی سخت مؤقف اختیار کیا۔
الیکشن کمیشن کا این اے 18 ہری پور ضمنی انتخاب سے متعلق تمام الزامات مسترد
این اے 18 ہری پور کے ضمنی انتخاب سے متعلق لگائے گئے تمام الزامات کو الیکشن کمیشن نے مکمل طور پر مسترد کرتے ہوئے واضح کیا ہے کہ انتخابی عمل کو تنازع بنانے کی کوشش کی جا رہی ہے۔ ڈان نیوز کے مطابق الیکشن کمیشن نے کہا کہ مخصوص حلقے الیکشن ہارنے کے بعد بے بنیاد اعتراضات اٹھا رہے ہیں، جبکہ ڈی آر او اور آر او کی تعیناتی سمیت تمام انتظامات قانون کے مطابق کیے گئے تھے۔
وزیراعلیٰ خیبرپختونخوا کا بانی پی ٹی آئی سے ملاقات کیلئے اڈیالہ جیل پہنچنے پر پولیس سے ٹکراؤ، فیکٹری ناکہ پر دھرنا
وزیراعلیٰ خیبرپختونخوا سہیل آفریدی بانی پی ٹی آئی کی صحت سے متعلق خدشات کے باعث اڈیالہ جیل پہنچے مگر پنجاب پولیس نے انہیں فیکٹری ناکے پر روک دیا جس کے بعد انہوں نے وہیں دھرنا دے دیا۔ وزیراعلیٰ کے ہمراہ ایم این اے شاہد خٹک، ایم پی اے مینا خان آفریدی اور دیگر رہنما بھی موجود تھے۔ جیل روڈ اور اطراف میں سخت سیکیورٹی تعینات ہے جبکہ متعدد ناکوں پر اضافی نفری گشت کر رہی ہے۔ میڈیا سے گفتگو میں سہیل آفریدی نے کہا کہ بانی پی ٹی آئی کی طبیعت ناسازی کی خبریں تشویش بڑھا رہی ہیں، ہم آج ملاقات چاہتے ہیں تاکہ حقیقت سامنے آئے۔ انہوں نے دعویٰ کیا کہ انتخابات میں عوام کا اعتماد متاثر ہوا ہے اور 95 فیصد ووٹر گھروں میں رہے، جو بانی پی ٹی آئی کے ساتھ یکجہتی کا اظہار ہے۔ وزیراعلیٰ نے کہا کہ ملاقات نہ ہونے پر خدشات بڑھ رہے ہیں اور وہ تمام قانونی راستوں پر غور کر رہے ہیں۔ موجودہ حکومت پر بھاری مالی بے ضابطگیوں کے الزامات بھی لگائے۔
توشہ خانہ ٹو کیس کی سماعت ملتوی — بانی پی ٹی آئی اور بشریٰ بی بی کو نئی تاریخ سے آگاہ
توشہ خانہ ٹو کیس کی سماعت 20 دسمبر تک ملتوی کر دی گئی۔ بانی پی ٹی آئی اور بشریٰ بی بی کے وکلاء کو نئی تاریخ سے آگاہ کر دیا گیا۔ اسپیشل جج سینٹرل ایف آئی اے نے کیس کی سماعت کے دوران فیصلہ سنایا۔
مولانا فضل الرحمٰن کا 27ویں آئینی ترمیم کو مکمل طور پر مسترد کرنے کا اعلان
جمعیت علمائے اسلام (ف) کے سربراہ مولانا فضل الرحمٰن نے 27ویں آئینی ترمیم کو یکسر مسترد کرتے ہوئے کہا ہے کہ پارلیمنٹ میں جے یو آئی کے ارکان نے اس کی مخالفت کی۔ اسلام آباد میں پریس کانفرنس کرتے ہوئے انہوں نے بتایا کہ مرکزی مجلس شوریٰ کے اجلاس میں ترمیم اور متعلقہ قوانین پر تفصیلی غور کیا گیا۔ ان کا کہنا تھا کہ 26ویں ترمیم حکومت کے ساتھ باہمی مشاورت سے منظور ہوئی تھی، مگر 27ویں ترمیم میں جے یو آئی کو مکمل طور پر نظرانداز کیا گیا۔
لاہور حافظ نعیم الرحمٰن کا اجتماع عام سے خطاب پاکستان کی خارجہ پالیسی آزاد ہو، امریکا کی غلامی نے ملک کو نقصان پہنچایا
لاہور میں جماعت اسلامی پاکستان کے اجتماع عام ’بدل دو نظام‘ سے خطاب کرتے ہوئے امیر جماعت اسلامی حافظ نعیم الرحمٰن نے کہا کہ پاکستان کی خارجہ پالیسی مکمل طور پر آزاد اور خودمختار ہونی چاہیے، کیونکہ امریکا کی غلامی نے ملک کو شدید نقصان پہنچایا۔ انہوں نے کہا کہ بلوچستان اور خیبرپختونخوا کی موجودہ حالت بھی انہی پالیسیوں کا نتیجہ ہے۔ انہوں نے فلسطین پالیسی سے انحراف پر حکومت کو تنقید کا نشانہ بنایا اور خبردار کیا کہ کشمیر یا فلسطین پر کوئی سمجھوتہ قوم قبول نہیں کرے گی۔
سابق گورنر پنجاب عمر سرفراز چیمہ کی 9 مئی جلاؤ گھیراؤ کیس میں ضمانت منظور
لاہور کی انسداد دہشت گردی عدالت نے 9 مئی کے جلاؤ گھیراؤ کیس میں سابق گورنر پنجاب عمر سرفراز چیمہ کی بعد از گرفتاری ضمانت منظور کرلی ہے۔ عدالت نے دیگر مقدمات میں ضمانتوں کی سماعت 25 نومبر تک ملتوی کردی۔ 9 مئی کے واقعات میں ملک بھر میں توڑ پھوڑ، جلاؤ گھیراؤ اور تشدد کے نتیجے میں املاک کو نقصان پہنچا جبکہ سینکڑوں گرفتاریاں ہوئیں۔
قومی اسمبلی سے 27ویں آئینی ترمیم کی منظوری، اپوزیشن کا بائیکاٹ
اسلام آباد میں قومی اسمبلی نے 27ویں آئینی ترمیم بھاری اکثریت سے منظور کرلی۔ وزیر قانون اعظم نذیر تارڑ کے مطابق ترمیم سے چیف جسٹس کے تقرر سے متعلق ابہام ختم ہوگیا۔ بلاول بھٹو نے اسے “میثاقِ جمہوریت کی تکمیل” قرار دیا، جبکہ اپوزیشن نے ایوان سے واک آؤٹ کیا۔