اسٹیٹ بینک کا شرح سود میں کمی کا فیصلہ، شرح سود 10.5 فیصد کر دی گئی
کراچی(رئیس الاخبار) :– اسٹیٹ بینک آف پاکستان نے مانیٹری پالیسی کا اعلان کرتے ہوئے پالیسی ریٹ میں 50 بیسز پوائنٹس کمی کر دی ہے، جس کے بعد شرح سود 11 فیصد سے کم ہو کر 10.5 فیصد ہو گئی ہے۔
اسٹیٹ بینک کی مانیٹری پالیسی کمیٹی کا اجلاس آج منعقد ہوا، جس میں ملکی معاشی اعشاریوں، مہنگائی کی صورتحال اور مجموعی اقتصادی رجحانات کا تفصیلی جائزہ لینے کے بعد اسٹیٹ بینک کا شرح سود میں کمی کا فیصلہ کیا گیا۔
واضح رہے کہ اس سے قبل اسٹیٹ بینک نے مسلسل چار اجلاسوں میں شرح سود کو 11 فیصد پر برقرار رکھا تھا، جبکہ آخری بار مئی 2025 میں پالیسی ریٹ میں 100 بیسز پوائنٹس کی کمی کی گئی تھی۔
ماہرین معاشیات کے مطابق حالیہ فیصلے سے کاروباری سرگرمیوں میں بہتری آنے، سرمایہ کاری میں اضافہ اور صنعتی شعبے کو ریلیف ملنے کا امکان ہے۔ تاجر برادری طویل عرصے سے بلند شرح سود کے باعث مشکلات کا شکار تھی اور مسلسل کمی کا مطالبہ کر رہی تھی۔
ماہرین کا کہنا ہے کہ اگرچہ اسٹیٹ بینک اپنی پالیسی میں محتاط رویہ اختیار کیے ہوئے ہے، تاہم مہنگائی میں کمی اور معاشی استحکام کے باعث آئندہ بھی شرح سود میں مزید نرمی کی گنجائش پیدا ہو سکتی ہے۔
زری پالیسی کمیٹی نے پالیسی ریٹ میں 50 بی پی پی ایس کم کرکے 10.5 فیصد کرنے کا فیصلہ کیا ہے۔https://t.co/UfuuMoNfQA pic.twitter.com/aWLanX3MfO
— SBP (@StateBank_Pak) December 15, 2025
