وفاقی آئینی عدالت کے حکم پر کوئٹہ میں بلدیاتی انتخابات ملتوی، الیکشن کمیشن کا نوٹیفکیشن جاری
اسلام آباد (رئیس الاخبار) : الیکشن کمیشن آف پاکستان (ای سی پی) نے وفاقی آئینی عدالت کے حکم پر عمل کرتے ہوئے کوئٹہ میں بلدیاتی انتخابات ملتوی کر دیے ہیں اور اس حوالے سے باضابطہ نوٹیفکیشن بھی جاری کر دیا ہے۔
الیکشن کمیشن کی جانب سے جاری نوٹیفکیشن میں کہا گیا ہے کہ وفاقی آئینی عدالت کے 24 دسمبر کے فیصلے کی تعمیل کرتے ہوئے کوئٹہ میں 28 دسمبر 2025 کو شیڈول بلدیاتی انتخابات تاحکمِ ثانی ملتوی کیے جا رہے ہیں۔ نوٹیفکیشن کے مطابق عدالت کے آئندہ حکم تک انتخابی عمل معطل رہے گا۔
واضح رہے کہ گزشتہ روز وفاقی آئینی عدالت کے چیف جسٹس امین الدین خان کی سربراہی میں تین رکنی بینچ نے کیس کی سماعت کے بعد کوئٹہ میں بلدیاتی انتخابات پر حکمِ امتناع جاری کیا تھا۔ عدالت نے اس معاملے میں تمام فریقین کو نوٹسز بھی جاری کر دیے ہیں۔
عدالت میں درخواست گزار عبدالقادر کے وکیل کامران مرتضیٰ نے مؤقف اختیار کیا تھا کہ کوئٹہ میں بلدیاتی انتخابات کے لیے کی گئی حلقہ بندیاں 2017 کی مردم شماری کی بنیاد پر تیار کی گئی ہیں، حالانکہ 2023 کی نئی مردم شماری کو باضابطہ طور پر نوٹیفائی کیا جا چکا ہے۔ ان کا کہنا تھا کہ آئینی اور قانونی تقاضوں کے مطابق بلدیاتی انتخابات نئی مردم شماری کے تحت ہونے چاہئیں۔
وکیل نے عدالت کو بتایا کہ پرانی مردم شماری کی بنیاد پر حلقہ بندیاں کرنے سے آبادی کی حقیقی نمائندگی متاثر ہو سکتی ہے، جس سے انتخابی عمل کی شفافیت اور مساوات پر سوالات اٹھتے ہیں۔ اس لیے کوئٹہ میں بلدیاتی انتخابات کے لیے نئی مردم شماری کے مطابق حلقہ بندیاں ناگزیر ہیں۔
وفاقی آئینی عدالت نے دلائل سننے کے بعد کوئٹہ میں بلدیاتی انتخابات پر حکمِ امتناع جاری کرتے ہوئے معاملے کی مزید سماعت کے لیے فریقین کو نوٹسز جاری کر دیے۔ عدالت کا کہنا تھا کہ جب تک کیس کا حتمی فیصلہ نہیں ہو جاتا، انتخابی عمل آگے نہیں بڑھایا جا سکتا۔
سیاسی اور سماجی حلقوں کی جانب سے کوئٹہ میں بلدیاتی انتخابات ملتوی فیصلے پر مختلف ردعمل سامنے آ رہا ہے۔ بعض حلقوں کا کہنا ہے کہ نئی مردم شماری کے مطابق حلقہ بندیاں جمہوری عمل کے لیے ضروری ہیں، جبکہ دیگر کا مؤقف ہے کہ انتخابات میں تاخیر سے مقامی حکومتوں کا نظام مزید متاثر ہو سکتا ہے۔
الیکشن کمیشن آف پاکستان نے واضح کیا ہے کہ وہ عدالت کے احکامات کی مکمل پاسداری کرے گا اور جیسے ہی آئندہ کوئی ہدایت موصول ہوگی، اس کے مطابق لائحہ عمل طے کیا جائے گا۔
الیکشن کمیشن نے کوئٹہ بلدیاتی انتخابات موخر کرنے کا نوٹیفیکیشن جاری کردیا
کوئٹہ میں بلدیاتی انتخابات کیلئے پولنگ اتوار کو ہونا تھی
وفاقی آئینی عدالت کے حکم امتناع کے باعث الیکشن کمیشن نے انتخاب موخر کردیا pic.twitter.com/u6DJ4DpK3z
— Rizwan Ghilzai (Remembering Arshad Sharif) (@rizwanghilzai) December 25, 2025
