پی سی بی چیئرمین محسن نقوی نے پاکستان کی نیدرلینڈز کے خلاف جیت فہیم اشرف کے جڑواں بیٹوں کے نام کردی
کولمبو: چیئرمین پاکستان کرکٹ بورڈ (پی سی بی) محسن نقوی نے ٹی ٹوئنٹی ورلڈکپ میں نیدرلینڈز کے خلاف پاکستان کی شاندار فتح آل راؤنڈر فہیم اشرف کے جڑواں بیٹوں کے نام کر دی۔
ٹی ٹوئنٹی ورلڈکپ کے افتتاحی میچ میں کولمبو کے میدان میں پاکستان اور نیدرلینڈز کی ٹیمیں آمنے سامنے آئیں جہاں سنسنی خیز مقابلے کے بعد پاکستان نے تین وکٹوں سے کامیابی حاصل کی۔ اس فتح میں مرکزی کردار فہیم اشرف کا رہا جنہوں نے آخری لمحات میں ذمہ دارانہ اور جارحانہ بیٹنگ کا مظاہرہ کرتے ہوئے ٹیم کو شکست سے بچایا۔
نیدرلینڈز نے پاکستان کی دعوت پر پہلے بیٹنگ کرتے ہوئے مقررہ اوورز میں 147 رنز بنائے۔ نیدرلینڈز کی جانب سے بیٹنگ لائن اپ نے محتاط آغاز کے بعد رنز بنانے کی کوشش کی تاہم پاکستانی بولرز نے باقاعدہ وقفوں سے وکٹیں حاصل کر کے دباؤ برقرار رکھا اور حریف ٹیم کو بڑا اسکور بنانے سے روک دیا۔
جواب میں پاکستان نے ہدف کا تعاقب اچھے آغاز کے ساتھ کیا مگر مڈل آرڈر ایک بار پھر مشکلات کا شکار نظر آیا۔ ابتدائی وکٹیں گرنے کے بعد ٹیم دباؤ میں آ گئی اور میچ آخری اوورز تک پہنچ گیا۔ ایک موقع پر پاکستان کو آخری دو اوورز میں 29 رنز درکار تھے جو ایک مشکل ہدف تصور کیا جا رہا تھا۔
ایسے نازک موقع پر فہیم اشرف کریز پر موجود تھے جنہوں نے غیر معمولی اعتماد اور حوصلے کا مظاہرہ کیا۔ فہیم اشرف نے انیسویں اوور میں جارحانہ بیٹنگ کرتے ہوئے تین شاندار چھکے لگائے اور ایک ہی اوور میں 24 رنز حاصل کر کے میچ کا رخ بدل دیا۔
آخری اوور میں بھی فہیم اشرف نے ذمہ دارانہ انداز اپناتے ہوئے ایک چوکا لگایا اور پاکستان کو فتح سے ہمکنار کر دیا۔ انہوں نے صرف 11 گیندوں پر ناقابل شکست 29 رنز اسکور کیے اور ٹیم کو تین وکٹوں سے کامیابی دلائی۔ شاندار کارکردگی پر انہیں میچ کا بہترین کھلاڑی قرار دیا گیا۔
پاکستان کی اس جیت کے بعد چیئرمین پی سی بی محسن نقوی نے سوشل میڈیا پلیٹ فارم ایکس پر فہیم اشرف کے جڑواں بچوں کی تصویر شیئر کی اور لکھا کہ نیدرلینڈز کی ٹیم نے بہترین کھیل پیش کیا اور وہ آج کی فتح فہیم اشرف کے خوبصورت جڑواں بچوں کے نام کرتے ہیں۔
محسن نقوی کے اس پیغام کو شائقین کرکٹ کی جانب سے خوب سراہا گیا اور اسے ایک جذباتی اور مثبت پیغام قرار دیا گیا۔ کرکٹ حلقوں کا کہنا ہے کہ ایسے لمحات نہ صرف کھلاڑیوں کا حوصلہ بڑھاتے ہیں بلکہ ٹیم کے ماحول کو بھی مضبوط بناتے ہیں۔
اس فتح کے ساتھ پاکستان نے ٹی ٹوئنٹی ورلڈکپ میں اپنے سفر کا کامیاب آغاز کر لیا ہے۔ ٹیم مینجمنٹ اور شائقین کو امید ہے کہ آنے والے میچز میں بھی پاکستانی ٹیم بہتر کارکردگی کا مظاہرہ کرے گی اور گزشتہ ٹورنامنٹس کی کمیوں پر قابو پاتے ہوئے شائقین کی توقعات پر پورا اترے گی۔
Well played, Netherlands! Today's game is dedicated to these adorable twin babies! Wishing them a healthy and happy life. pic.twitter.com/gOOlYduPRU
— Mohsin Naqvi (@MohsinnaqviC42) February 7, 2026
