پاکستان میں محرم الحرام 1448 ہجری کا چاند نظر نہیں آیا، یومِ عاشور 26 جون کو ہوگا

پاکستان میں محرم الحرام 1448 ہجری کا چاند نظر نہیں آیا، یومِ عاشور 26 جون کو ہوگا، وزارتِ مذہبی امور نے بھی باقاعدہ نوٹی فکیشن جاری کر دیا

لاہور: مرکزی رویت ہلال کمیٹی نے پاکستان میں ماہِ محرم الحرام 1448 ہجری کا چاند نظر نہ آنے کا اعلان کر دیا ہے، جس کے بعد ملک بھر میں یکم محرم الحرام 17 جون بروز بدھ کو ہوگی، جبکہ یومِ عاشور (10 محرم) 26 جون بروز جمعہ منایا جائے گا۔

ماہِ محرم الحرام کا چاند دیکھنے کے لیے مرکزی رویت ہلال کمیٹی کا اجلاس بادشاہی مسجد لاہور میں چیئرمین مولانا عبدالخبیر آزاد کی زیر صدارت منعقد ہوا۔ اجلاس میں کمیٹی کے اراکین کے علاوہ محکمہ موسمیات اور خلائی تحقیق کے ادارے سپارکو کے نمائندگان نے بھی شرکت کی۔

اس دوران کراچی، کوئٹہ، پشاور، اسلام آباد اور دیگر شہروں میں زونل رویت ہلال کمیٹیوں کے الگ الگ اجلاس بھی منعقد ہوئے، جہاں موصول ہونے والی شہادتوں اور سائنسی معلومات کا جائزہ لیا گیا۔

اجلاس کے بعد میڈیا سے گفتگو کرتے ہوئے چیئرمین رویت ہلال کمیٹی مولانا عبدالخبیر آزاد نے بتایا کہ ملک کے کسی بھی حصے سے چاند نظر آنے کی مستند شہادت موصول نہیں ہوئی، جس کے بعد اتفاقِ رائے سے فیصلہ کیا گیا کہ یکم محرم الحرام 1448 ہجری 17 جون بروز بدھ ہوگی۔

بعد ازاں وزارتِ مذہبی امور نے بھی باقاعدہ نوٹی فکیشن جاری کرتے ہوئے اعلان کیا کہ ملک بھر میں نئے اسلامی سال کا آغاز 17 جون سے ہوگا، جبکہ 10 محرم الحرام یعنی یومِ عاشور 26 جون بروز جمعہ عقیدت و احترام کے ساتھ منایا جائے گا۔

محرم الحرام اسلامی سال کا پہلا مہینہ ہے، جسے مسلمانوں کے نزدیک خصوصی مذہبی اور تاریخی اہمیت حاصل ہے۔ خصوصاً یومِ عاشور حضرت امام حسینؓ اور ان کے جانثار ساتھیوں کی عظیم قربانیوں کی یاد دلاتا ہے، جنہوں نے حق اور انصاف کے لیے لازوال مثال قائم کی۔