کسٹمز کارروائیاں: 7 کروڑ 70 لاکھ مالیت کی نان کسٹم پیڈ گاڑیاں اور اسمگل شدہ سامان ضبط

حیدرآباد کسٹمز کی بڑی کارروائی، کروڑوں روپے کی گاڑیاں، ڈیزل اور اسمگل شدہ سامان پکڑا گیا

نان کسٹم پیڈ گاڑیاں اور اسمگل شدہ سامان کے خلاف پاکستان کسٹمز انفورسمنٹ حیدرآباد نے بڑی کارروائیاں کرتے ہوئے 7 کروڑ 70 لاکھ روپے سے زائد مالیت کا سامان ضبط کر لیا۔ یہ کارروائیاں انٹیلی جنس اطلاعات کی بنیاد پر کی گئیں اور ان کا مقصد اسمگلنگ کے خاتمے، قانونی تجارت کے فروغ اور قومی محصولات کے تحفظ کو یقینی بنانا ہے۔

فیڈرل بورڈ آف ریونیو (ایف بی آر) کے مطابق گزشتہ ایک ہفتے کے دوران کسٹمز انفورسمنٹ ٹیموں نے 21 نان کسٹم پیڈ گاڑیاں قبضے میں لیں جن کی مجموعی مالیت تقریباً 61 ملین روپے ہے۔ ضبط کی جانے والی گاڑیوں میں مسافر اور کمرشل دونوں اقسام کی گاڑیاں شامل ہیں۔

حکام کے مطابق گاڑیوں کے مالکان قانونی درآمد سے متعلق مطلوبہ دستاویزات پیش کرنے میں ناکام رہے جس کے باعث کسٹمز قوانین کے تحت انہیں ضبط کر لیا گیا۔ یہ کارروائی غیر قانونی طور پر درآمد شدہ گاڑیوں کے خلاف جاری مہم کا حصہ ہے۔

کسٹمز حکام نے 6 مختلف کارروائیوں کے دوران اسمگل شدہ سامان کی کھیپیں بھی پکڑیں جن کی مجموعی مالیت تقریباً 10.098 ملین روپے بتائی گئی ہے۔ ضبط شدہ سامان میں الیکٹرانک مصنوعات، بھارتی ساختہ ممنوعہ گٹکا، صنعتی مصنوعات اور ٹیکسٹائل اشیا شامل ہیں۔

اسی دوران پیٹرولیم مصنوعات کی اسمگلنگ کے خلاف بھی مؤثر کارروائیاں کی گئیں۔ کسٹمز ٹیموں نے دو مختلف کھیپوں سے 15 ہزار لیٹر ہائی اسپیڈ ڈیزل اور اسمگل شدہ پیٹرول ضبط کیا، جن کی مجموعی مالیت تقریباً 5.867 ملین روپے ہے۔

ایف بی آر کے مطابق اسمگل شدہ ایندھن کی ضبطی نہ صرف قومی خزانے کو نقصان سے بچانے میں مددگار ثابت ہوگی بلکہ غیر قانونی کاروباری نیٹ ورکس کے خلاف بھی ایک اہم کامیابی ہے۔

تمام مقدمات میں متعلقہ افراد کے خلاف کسٹمز ایکٹ 1969 اور دیگر متعلقہ قوانین کے تحت قانونی کارروائی شروع کر دی گئی ہے۔ اس کے علاوہ اسمگلنگ میں ملوث منظم گروہوں اور نیٹ ورکس کی نشاندہی کے لیے تحقیقات بھی جاری ہیں۔

حکام کا کہنا ہے کہ مستقبل میں بھی انٹیلی جنس بیسڈ کارروائیوں کا سلسلہ جاری رکھا جائے گا تاکہ نان کسٹم پیڈ گاڑیاں، اسمگل شدہ سامان اور غیر قانونی پیٹرولیم مصنوعات کی نقل و حرکت کو روکا جا سکے۔