پاکستان کسٹمز نے کراچی میں 36 کروڑ روپے مالیت کی منشیات اسمگلنگ کی کوشش ناکام بنا دی
کراچی کسٹمز منشیات اسمگلنگ کے خلاف بڑی کارروائی کرتے ہوئے پاکستان کسٹمز نے کراچی انٹرنیشنل میل آفس کے ذریعے منشیات اسمگل کرنے کی ایک بڑی کوشش ناکام بنا دی۔
پاکستان کسٹمز کے مطابق معمول کی اسکیننگ کے دوران تھائی لینڈ سے آنے والے دو مشکوک پارسلز کی جانچ کی گئی، جن میں موجود پلاسٹک کے کھلونوں کے ڈبوں سے 12 کلوگرام چرس برآمد ہوئی۔
حکام کا کہنا ہے کہ برآمد ہونے والی چرس کی مجموعی مالیت تقریباً 36 کروڑ 62 لاکھ روپے ہے، جبکہ بین الاقوامی ڈاک کے ذریعے منشیات اسمگلنگ کی یہ ایک منظم کوشش تھی، جسے بروقت کارروائی کرتے ہوئے ناکام بنا دیا گیا۔
کسٹمز حکام کے مطابق دونوں پارسلز الگ الگ بھیجے گئے تھے اور ابتدائی تفتیش کے بعد اس اسمگلنگ میں ملوث ممکنہ نیٹ ورک کی شناخت کے لیے تحقیقات کا آغاز کر دیا گیا ہے۔
پاکستان کسٹمز نے کہا ہے کہ بین الاقوامی میل سسٹم کے ذریعے غیر قانونی اشیا اور منشیات کی اسمگلنگ روکنے کے لیے نگرانی مزید سخت کی جا رہی ہے، جبکہ ذمہ دار عناصر کے خلاف قانون کے مطابق کارروائی عمل میں لائی جائے گی۔
حکام نے اس عزم کا اظہار کیا کہ ملک کے داخلی و خارجی راستوں پر اسمگلنگ کے خلاف کارروائیاں بلاامتیاز جاری رہیں گی تاکہ منشیات کی غیر قانونی ترسیل کو روکا جا سکے۔
READ MORE FAQS
- منشیات کہاں سے برآمد کی گئیں؟
کراچی انٹرنیشنل میل آفس میں تھائی لینڈ سے آنے والے دو پارسلز سے چرس برآمد کی گئی۔
- کتنی مقدار میں چرس برآمد ہوئی؟
کسٹمز حکام کے مطابق 12 کلوگرام چرس برآمد کی گئی۔
- برآمد شدہ منشیات کی مالیت کتنی ہے؟
اس کی مالیت تقریباً 36 کروڑ 62 لاکھ روپے بتائی گئی ہے۔
- منشیات کیسے چھپائی گئی تھی؟
چرس کو پلاسٹک کے کھلونوں کے ڈبوں میں مہارت سے چھپایا گیا تھا۔
