شہباز شریف نے اسپین کو فیفا ورلڈ کپ 2026 جیتنے پر مبارکباد دی

وزیراعظم شہباز شریف کی اسپین کو ورلڈ کپ فتح پر مبارکباد، کامیاب میزبانی پر امریکا، کینیڈا اور میکسیکو کو بھی سراہا

شہباز شریف نے اسپین کو فیفا ورلڈ کپ 2026 جیتنے پر مبارکباد دیتے ہوئے ہسپانوی ٹیم کی شاندار کارکردگی، نظم و ضبط اور بہترین ٹیم ورک کو سراہا ہے۔

وزیراعظم شہباز شریف نے سماجی رابطے کے پلیٹ فارم ایکس (X) پر جاری اپنے پیغام میں کہا کہ اسپین نے پورے ٹورنامنٹ کے دوران غیر معمولی مہارت، اتحاد اور بہترین کھیل کا مظاہرہ کیا، جس کے باعث وہ عالمی ٹائٹل کی مستحق قرار پائی۔

انہوں نے کہا کہ اسپینش ٹیم کی مسلسل عمدہ کارکردگی اور ٹیم ورک اس کامیابی کی بنیاد بنا، جس پر پوری ٹیم مبارکباد کی مستحق ہے۔

وزیراعظم نے ورلڈ کپ 2026 کی کامیاب میزبانی پر امریکی صدر ڈونلڈ ٹرمپ اور امریکا کے عوام کو بھی مبارکباد پیش کی اور اس عالمی ایونٹ کے کامیاب انعقاد کو قابلِ تعریف قرار دیا۔

انہوں نے کینیڈا اور میکسیکو کی حکومتوں اور عوام کو بھی مشترکہ میزبانی میں تعاون اور بہترین انتظامات پر سراہتے ہوئے کہا کہ تینوں میزبان ممالک نے دنیا کے سب سے بڑے فٹبال ایونٹ کے انعقاد میں اہم کردار ادا کیا۔

شہباز شریف نے فیفا کے صدر جیانی انفانٹینو اور ان کی پوری ٹیم کی کاوشوں کو بھی خراجِ تحسین پیش کیا۔ ان کا کہنا تھا کہ اس عالمی ایونٹ نے فٹبال کے کھیل کو مزید مقبول بنانے اور دنیا بھر میں کھیلوں کے فروغ میں اہم کردار ادا کیا ہے۔

وزیراعظم نے اپنے پیغام میں اس امید کا اظہار بھی کیا کہ کھیل مستقبل میں بھی مختلف قوموں، ثقافتوں اور معاشروں کے درمیان دوستی، اتحاد اور عالمی ہم آہنگی کے فروغ کا ذریعہ بنتے رہیں گے۔

انہوں نے کہا کہ کھیل صرف مقابلے کا نام نہیں بلکہ امن، باہمی احترام اور بین الاقوامی تعاون کے فروغ کا بھی ایک مؤثر ذریعہ ہیں، اور ایسے عالمی مقابلے دنیا کو ایک دوسرے کے قریب لانے میں مثبت کردار ادا کرتے ہیں۔