دنیا کے مقبول یوٹیوبر مسٹر بیسٹ نے تھیا بوئسن سے شادی کرلی، تصاویر سوشل میڈیا پر وائرل

مسٹر بیسٹ کی شادی، معروف یوٹیوبر نے تھیا بوئسن سے رشتۂ ازدواج میں منسلک ہوگئے

مسٹر بیسٹ کی شادی کی خبر نے دنیا بھر میں ان کے کروڑوں مداحوں کی توجہ حاصل کر لی ہے۔ دنیا کے معروف یوٹیوبر جمی ڈونلڈسن (MrBeast) نے اپنی دیرینہ دوست، جنوبی افریقا سے تعلق رکھنے والی گیمنگ اسٹریمر اور کنٹینٹ کریئیٹر تھیا بوئسن کے ساتھ باقاعدہ شادی کر لی۔

مسٹر بیسٹ نے اپنی شادی کی خوشخبری سوشل میڈیا پلیٹ فارم انسٹاگرام پر شیئر کرتے ہوئے تقریب کی خوبصورت تصاویر پوسٹ کیں۔ انہوں نے اپنی پوسٹ میں لکھا:

"مجھے میری مسز بیسٹ مل گئی، اور یہ میری زندگی کا بہترین دن تھا۔”

اس جذباتی پیغام کے بعد دنیا بھر سے مداحوں، مشہور شخصیات اور دیگر کنٹینٹ کریئیٹرز نے انہیں شادی کی مبارکباد پیش کی۔

وائرل تصاویر میں نوبیاہتا جوڑا انتہائی خوشگوار انداز میں نظر آیا۔ 28 سالہ مسٹر بیسٹ نے کریم رنگ کا خوبصورت ٹکسیڈو اور سیاہ بو ٹائی پہن رکھی تھی، جبکہ 26 سالہ تھیا بوئسن سفید رنگ کے نفیس لیس سے مزین عروسی لباس میں دکھائی دیں۔

مداحوں نے تصاویر پر دلچسپ تبصرے بھی کیے۔ ایک صارف نے لکھا کہ "جمی، تم ہر خوشی کے مستحق ہو۔” جبکہ ایک اور مداح نے اس جوڑے کو ایک دوسرے کے لیے بہترین ساتھی قرار دیا۔

رپورٹس کے مطابق مسٹر بیسٹ اور تھیا بوئسن کی پہلی ملاقات 2022 میں جنوبی افریقا میں ایک مشترکہ دوست کے ذریعے ہوئی تھی۔ دونوں کی مشترکہ دلچسپیاں، خصوصاً یوٹیوب، سائنس، ٹیکنالوجی اور نئی چیزیں سیکھنے کا شوق، ان کی دوستی کو مضبوط بنانے کا سبب بنیں۔

بعد ازاں جنوری 2025 میں مسٹر بیسٹ نے منفرد انداز میں اپنی منگنی کا اعلان کیا، جس نے بھی سوشل میڈیا پر کافی مقبولیت حاصل کی تھی۔

تھیا بوئسن صرف ایک کامیاب گیمنگ اسٹریمر ہی نہیں بلکہ ایک مصنفہ اور ڈیجیٹل کنٹینٹ کریئیٹر بھی ہیں۔ انہوں نے اسٹیلن بوش یونیورسٹی سے قانون میں بیچلرز اور نفسیات میں آنرز کی ڈگری حاصل کی، جبکہ بعد ازاں یونیورسٹی آف ایڈنبرا سے ہیومن کاگنیٹو نیورو سائیکالوجی میں ماسٹرز مکمل کیا۔

تھیا 2016 سے ٹوئچ اور یوٹیوب پر سرگرم ہیں، جہاں وہ خاص طور پر اسٹریٹجی کارڈ گیمز اور گیمنگ کنٹینٹ کی وجہ سے عالمی سطح پر پہچانی جاتی ہیں۔

مسٹر بیسٹ اس وقت دنیا کے سب سے زیادہ مقبول اور بااثر یوٹیوبرز میں شمار ہوتے ہیں، جبکہ ان کی شادی کی تصاویر سوشل میڈیا پر لاکھوں صارفین کی توجہ کا مرکز بنی ہوئی ہیں۔