این ڈی ایم اے کی پیشگوئی: 5 اگست تک ملک بھر میں بارشوں کا سلسلہ، متعدد علاقوں میں اربن فلڈنگ اور لینڈ سلائیڈنگ کا خدشہ

این ڈی ایم اے کی پیشگوئی: 5 اگست تک ملک بھر میں بارشوں کا سلسلہ، متعدد علاقوں میں اربن فلڈنگ اور لینڈ سلائیڈنگ کا خدشہ

اسلام آباد: نیشنل ڈیزاسٹر مینجمنٹ اتھارٹی (این ڈی ایم اے) کے نیشنل ایمرجنسی آپریشن سینٹر (NEOC) نے 31 جولائی سے 5 اگست 2026 تک ملک بھر کے لیے موسم سے متعلق ایڈوائزری جاری کرتے ہوئے مختلف علاقوں میں بارش، گرج چمک، تیز ہواؤں اور چند مقامات پر موسلادھار بارش کی پیشگوئی کی ہے۔

این ڈی ایم اے کے مطابق پنجاب، خیبرپختونخوا، بلوچستان، سندھ، گلگت بلتستان اور آزاد کشمیر کے مختلف اضلاع میں بارشوں کا امکان ہے، جبکہ نشیبی علاقوں میں اربن فلڈنگ، پہاڑی علاقوں میں لینڈ سلائیڈنگ اور برساتی ندی نالوں میں طغیانی کا خدشہ بھی ظاہر کیا گیا ہے۔

پنجاب میں کن علاقوں میں بارش متوقع؟

محکمہ نے بتایا کہ راولپنڈی، اسلام آباد، مری، اٹک، چکوال، جہلم، میانوالی، خوشاب، سرگودھا، گجرات، سیالکوٹ، گوجرانوالہ، لاہور، قصور، شیخوپورہ، فیصل آباد، ٹوبہ ٹیک سنگھ، جھنگ، بھکر، ساہیوال، اوکاڑہ، پاکپتن، وہاڑی، خانیوال، ملتان، لودھراں، مظفرگڑھ، ڈیرہ غازی خان، بہاولپور، بہاولنگر، رحیم یار خان سمیت متعدد اضلاع میں بارش، آندھی اور گرج چمک کی توقع ہے۔

ادارے کے مطابق بعض مقامات پر موسلادھار بارش بھی ہو سکتی ہے، تاہم مجموعی طور پر موسم گرم اور مرطوب رہے گا جبکہ دن کے وقت درجہ حرارت نسبتاً بلند رہنے کا امکان ہے۔

خیبرپختونخوا اور شمالی علاقوں میں بھی بارش

ایڈوائزری کے مطابق چترال، دیر، سوات، کوہستان، مانسہرہ، ایبٹ آباد، ہری پور، مردان، پشاور، نوشہرہ، چارسدہ، خیبر، کرم، ہنگو، بنوں، لکی مروت، ٹانک، وزیرستان اور ڈیرہ اسماعیل خان سمیت کئی اضلاع میں بارش، گرج چمک اور تیز ہواؤں کی پیشگوئی کی گئی ہے۔

بلوچستان اور سندھ کا موسم

بلوچستان کے کوئٹہ، ژوب، زیارت، قلعہ عبداللہ، قلعہ سیف اللہ، سبی، لورالائی، خضدار، کوہلو، جعفر آباد، نصیر آباد اور دیگر علاقوں میں کہیں کہیں بارش کا امکان ظاہر کیا گیا ہے۔

سندھ میں کراچی، حیدرآباد، سکھر، لاڑکانہ، شکارپور، گھوٹکی، جیکب آباد، دادو سمیت مختلف علاقوں میں ہلکی سے درمیانی بارش جبکہ تھرپارکر، عمرکوٹ، میرپورخاص، بدین، سانگھڑ اور مٹلی میں کہیں کہیں موسلادھار بارش متوقع ہے۔

گلگت بلتستان اور آزاد کشمیر

این ڈی ایم اے کے مطابق گلگت، ہنزہ، نگر، استور، اسکردو، دیامر، غذر، شگر، گانچھے اور آزاد کشمیر کے نیلم ویلی، مظفرآباد، ہٹیاں بالا، باغ، حویلی، پونچھ، سدھنوتی، کوٹلی، میرپور اور بھمبر میں بھی بارشوں کا سلسلہ جاری رہنے کا امکان ہے۔

اگست میں مجموعی بارش معمول سے کم رہنے کا امکان

ماہانہ موسمی جائزے کے مطابق جولائی 2026 میں پاکستان بھر میں مجموعی بارش معمول سے تقریباً 6 فیصد کم ریکارڈ کی گئی، جبکہ سندھ اور بلوچستان میں معمول سے نمایاں کم بارش ہوئی۔

این ڈی ایم اے کے مطابق اگست 2026 کے دوران ملک کے بیشتر علاقوں میں معمول سے کم بارش متوقع ہے، جبکہ گلگت بلتستان، شمالی خیبرپختونخوا اور چند شمالی علاقوں میں معمول کے مطابق بارش ہونے کا امکان ہے۔

درجہ حرارت بھی معمول سے زیادہ رہنے کی پیشگوئی

ادارے نے خبردار کیا ہے کہ اگست کے دوران ملک کے بیشتر حصوں، خصوصاً وسطی و شمال مشرقی پنجاب، خیبرپختونخوا، شمالی بلوچستان اور کشمیر میں درجہ حرارت معمول سے زیادہ رہنے کا امکان ہے۔

این ڈی ایم اے نے شہریوں، مسافروں اور متعلقہ اداروں کو ہدایت کی ہے کہ موسمی صورتحال کے پیش نظر احتیاطی تدابیر اختیار کریں، غیر ضروری سفر سے گریز کریں اور مقامی انتظامیہ کی ہدایات پر عمل کریں۔

🌧️ Rain-wind/thundershowers with isolated heavy falls are expected in Kashmir, GB, KP & Upper Punjab. Meanwhile, hot & humid weather will continue over southern Pakistan.
Stay updated with PMD.#PMD #WeatherUpdate #PakistanWeather #RainAlert #Monsoon2026 #WeatherForecast pic.twitter.com/sKoivDm3Ma
— Pak Met Department محکمہ موسمیات (@pmdgov) August 4, 2026