رونالڈو کی شادی کی افواہ، ہزاروں مداح چرچ پہنچ گئے؛ دلہا کوئی اور نکلا

رونالڈو کی شادی کی افواہ، ہزاروں مداح چرچ پہنچ گئے؛ دلہا کوئی اور نکلا، کرسٹیانو رونالڈو نے بھی مداحوں کے ہجوم کی ویڈیو پر ہنستے ہوئے ایموجیز کے ذریعے ردعمل دیا

پرتگال کے معروف فٹبالر کرسٹیانو رونالڈو کی شادی کی افواہ نے ہزاروں مداحوں کو میڈیرا کے فنچل کیتھیڈرل کے باہر جمع کردیا، تاہم کئی گھنٹوں کے انتظار کے بعد مداحوں کو معلوم ہوا کہ شادی رونالڈو کی نہیں بلکہ کسی اور پرتگالی جوڑے کی تھی۔

سوشل میڈیا پر گزشتہ کئی روز سے کرسٹیانو رونالڈو اور ان کی گرل فرینڈ جارجینا روڈریگز کی شادی سے متعلق خبریں گردش کر رہی تھیں، تاہم دونوں کی جانب سے تاحال شادی کی باضابطہ تصدیق نہیں کی گئی۔

رونالڈو کی شادی کی افواہ اس وقت مزید زور پکڑ گئی جب یہ دعویٰ سامنے آیا کہ پرتگالی اسٹار فٹبالر ہفتے کے روز اپنے آبائی علاقے میڈیرا میں شادی کرنے والے ہیں۔

خبر پھیلتے ہی رونالڈو کے ہزاروں مداح اپنے پسندیدہ فٹبالر کو دولہا دیکھنے کے لیے چرچ کے باہر پہنچ گئے۔ مداح کئی گھنٹوں تک چرچ کے باہر موجود رہے اور رونالڈو اور جارجینا کے باہر آنے کا انتظار کرتے رہے۔

چرچ سے دلہا دلہن نکلے تو مداح حیران رہ گئے

کئی گھنٹوں کے انتظار کے بعد بالآخر چرچ سے دلہا اور دلہن باہر آئے تو وہاں موجود ہزاروں مداحوں کو اندازہ ہوا کہ یہ رونالڈو اور جارجینا نہیں ہیں۔

چرچ سے باہر آنے والا جوڑا پرتگالی شہری فابیو راموس اور فاطمہ نکول کونہا ٹیکسیرا تھا، جو فرانس میں مقیم ہیں اور اپنی شادی کی تقریب کے لیے پرتگال آئے تھے۔

نوبیاہتا جوڑا اور شادی میں شریک مہمان بھی چرچ کے باہر موجود غیر معمولی ہجوم کو دیکھ کر حیران رہ گئے۔ مداحوں کی بڑی تعداد دراصل رونالڈو کی ممکنہ شادی دیکھنے کے لیے جمع ہوئی تھی۔

رونالڈو کی بہن کا بھی دلچسپ ردعمل

رونالڈو کی بہن ایلما ایویرو نے بھی سوشل میڈیا پر سامنے آنے والی ہجوم کی ویڈیو پر ردعمل دیا۔

انہوں نے حیرت کا اظہار کرتے ہوئے سوال کیا کہ خاندان کی جانب سے کسی باضابطہ اعلان کے بغیر لوگوں نے رونالڈو کی شادی کی افواہ پر یقین کیسے کرلیا۔

دوسری جانب خود کرسٹیانو رونالڈو نے بھی مداحوں کے ہجوم کی ویڈیو پر ہنستے ہوئے ایموجیز کے ذریعے ردعمل دیا، جس سے اندازہ ہوتا ہے کہ فٹبال اسٹار بھی اس صورتحال سے محظوظ ہوئے۔

رونالڈو اور جارجینا کی شادی کی حقیقت کیا ہے؟

کرسٹیانو رونالڈو اور جارجینا روڈریگز کی جانب سے شادی کے حوالے سے تاحال کوئی باضابطہ اعلان سامنے نہیں آیا۔

اس کے باوجود برطانوی اور پرتگالی میڈیا میں دونوں کی ممکنہ شادی سے متعلق قیاس آرائیاں جاری ہیں۔ بعض رپورٹس میں فنچل کیتھیڈرل کو ممکنہ شادی کی تقریب کے مقام کے طور پر بھی پیش کیا جا رہا ہے۔

تاہم جب تک رونالڈو یا جارجینا خود شادی کی تاریخ اور مقام کی تصدیق نہیں کرتے، ان سے متعلق گردش کرنے والی خبروں کو محض قیاس آرائی ہی سمجھا جائے گا۔

یوں رونالڈو کی شادی دیکھنے کے لیے گھنٹوں انتظار کرنے والے ہزاروں مداحوں کو بالآخر ایک ایسی شادی دیکھنے کو ملی جس میں دولہا پرتگالی اسٹار فٹبالر نہیں بلکہ ایک عام پرتگالی شہری تھا۔

Um boato de que Cristiano Ronaldo e Georgina Rodríguez teriam se casado levou cerca de 2 mil pessoas à Catedral do Funchal, em Portugal.

O casamento, porém, era de outro casal, que precisou atravessar a multidão para entrar na igreja. Cristiano reagiu à confusão com emojis de… pic.twitter.com/Nwzd2DWze0
— turmapop (@turmapop) August 9, 2026