ٹرمپ کا عاصم منیر کو فون، ایران سے مذاکرات کیلئے کردار ادا کرنے کی درخواست

ٹرمپ کا فیلڈ مارشل عاصم منیر کو فون، ایران کو مذاکرات پر آمادہ کرنے کی درخواست

ٹرمپ کا عاصم منیر کو فون گزشتہ ہفتے ہوا، جس میں ایران سے متعلق اہم سفارتی امور پر گفتگو کیے جانے کی اطلاع سامنے آئی ہے۔ غیر ملکی خبررساں ایجنسی رائٹرز نے پاکستانی ذرائع کے حوالے سے امریکی صدر ڈونلڈ ٹرمپ اور پاکستان کے آرمی چیف و چیف آف ڈیفنس فورسز فیلڈ مارشل عاصم منیر کے درمیان ٹیلی فونک رابطے کی خبر دی ہے۔

رائٹرز کے مطابق دو پاکستانی ذرائع نے بتایا کہ امریکی جانب سے بنیادی طور پر پاکستان سے درخواست کی گئی کہ وہ ایران پر اپنے اثر و رسوخ کو استعمال کرتے ہوئے اسے دوبارہ مذاکرات کی میز پر لانے میں کردار ادا کرے۔

رپورٹ میں کہا گیا ہے کہ یہ رابطہ گزشتہ ہفتے امریکی صدر ڈونلڈ ٹرمپ کی جانب سے کیا گیا تھا۔ تاہم فیلڈ مارشل عاصم منیر اور صدر ٹرمپ کے درمیان ہونے والی گفتگو کی مکمل تفصیلات فوری طور پر سامنے نہیں آسکیں۔

رائٹرز کے مطابق وائٹ ہاؤس کے پریس سیکرٹری کے دفتر سے اس حوالے سے تبصرے کی درخواست کی گئی، تاہم فوری طور پر کوئی جواب موصول نہیں ہوا۔ اس لیے دونوں رہنماؤں کے درمیان ہونے والی گفتگو کے دیگر نکات کی آزادانہ طور پر تصدیق نہیں ہو سکی۔

یہ پیش رفت ایک ایسے وقت میں سامنے آئی ہے جب پاکستان خطے میں کشیدگی کم کرنے اور امن و استحکام کے لیے سفارتی کوششوں پر زور دے رہا ہے۔ پاکستان کے ایران کے ساتھ قریبی جغرافیائی اور علاقائی روابط ہیں، جبکہ دونوں ممالک کے درمیان اعلیٰ سطحی رابطے بھی جاری ہیں۔

فیلڈ مارشل عاصم منیر حالیہ دورہ ایران کے سلسلے میں تہران پہنچے، جہاں انہوں نے ایرانی وزیر داخلہ اسکندر مومنی سے ملاقات کی۔ ملاقات میں وفاقی وزیر داخلہ محسن نقوی بھی شریک تھے۔

ملاقات کے دوران پاکستان اور ایران کے باہمی تعلقات، تعاون، علاقائی صورتحال اور امن و استحکام سے متعلق امور پر تبادلہ خیال کیا گیا۔ دونوں جانب سے خطے میں امن کے فروغ اور روابط کو مزید مضبوط بنانے کی اہمیت پر بھی گفتگو ہوئی۔

آئی ایس پی آر کے مطابق فیلڈ مارشل عاصم منیر کا دورہ ایران علاقائی امن و استحکام کے فروغ کے لیے پاکستان کی جاری کوششوں کا حصہ ہے۔

پاکستان کی جانب سے ایران اور دیگر علاقائی فریقوں کے ساتھ رابطے ایسے وقت میں اہمیت اختیار کر گئے ہیں جب خطے میں سفارتی کشیدگی کم کرنے اور مذاکرات کے ذریعے مسائل کے حل پر توجہ دی جا رہی ہے۔