بانی پی ٹی آئی کی ہسپتال منتقلی کا معاملہ، توہین عدالت درخواست کے اعتراضات دور

بانی پی ٹی آئی کی ہسپتال منتقلی، پی ٹی آئی کی توہین عدالت درخواست دوبارہ دائر کرنے کی تیاری

بانی پی ٹی آئی کی ہسپتال منتقلی کے معاملے پر پی ٹی آئی کی جانب سے سپریم کورٹ میں دائر توہین عدالت کی درخواست پر رجسٹرار آفس کا اعتراض دور کر دیا گیا ہے۔

رجسٹرار آفس کی جانب سے درخواست پر یہ اعتراض عائد کیا گیا تھا کہ توہین عدالت کے مرتکب قرار دیے جانے والے افراد کے خلاف الزامات کی فہرست درخواست کے ساتھ فراہم نہیں کی گئی۔ پی ٹی آئی چیئرمین بیرسٹر گوہر نے رجسٹرار آفس میں الزامات کی فہرست جمع کرا دی۔

اس سے قبل سپریم کورٹ رجسٹرار آفس نے اعتراض عائد کرتے ہوئے توہین عدالت کی درخواست واپس کر دی تھی۔ ذرائع کے مطابق درخواست میں فریقین پر عائد کیے گئے توہین عدالت کے الزامات کی تفصیلات الگ سے فراہم نہ کرنے کو اعتراض کی بنیاد بنایا گیا تھا۔

سپریم کورٹ کے باہر میڈیا سے گفتگو کرتے ہوئے بیرسٹر گوہر نے بتایا کہ رجسٹرار سپریم کورٹ سے سہولت سینٹر میں ملاقات ہوئی اور رجسٹرار آفس کی جانب سے درخواست پر عائد اعتراض سے آگاہ کیا گیا۔

بیرسٹر گوہر کے مطابق اعتراض یہ تھا کہ توہین عدالت کے مرتکب افراد کو الزامات کی فہرست فراہم نہیں کی گئی۔ انہوں نے کہا کہ پی ٹی آئی نے اعتراض دور کرتے ہوئے متعلقہ فہرست رجسٹرار آفس میں جمع کرا دی ہے۔

چیئرمین پی ٹی آئی نے مزید بتایا کہ درخواست کو جلد سماعت کے لیے بھی رجوع کیا گیا تھا اور توہین عدالت کی درخواست دوبارہ دائر کرنے کا فیصلہ کیا گیا ہے۔

انہوں نے بانی پی ٹی آئی کی صحت کو اہم قرار دیتے ہوئے مطالبہ کیا کہ ان کے خاندان کے افراد کو ملاقات کی اجازت دی جائے۔ بیرسٹر گوہر کا کہنا تھا کہ پی ٹی آئی اپنی جانب سے کیا گیا وعدہ پورا کر چکی ہے۔

بانی پی ٹی آئی کی ہسپتال منتقلی کے معاملے پر عمران خان کی بہن عظمیٰ خان کی جانب سے بھی حکومت کے خلاف توہین عدالت کی درخواست دائر کی گئی تھی۔ درخواست میں وزیراعظم شہباز شریف، وفاقی وزیر قانون اعظم نذیر تارڑ، وزیر اطلاعات عطا تارڑ اور دیگر کو فریق بنایا گیا تھا۔

اب رجسٹرار آفس کا اعتراض دور کیے جانے کے بعد درخواست کو دوبارہ دائر کرنے اور اس پر عدالتی کارروائی آگے بڑھنے کی راہ ہموار ہوگئی ہے۔