بلاول بھٹو زرداری کی منگنی اور شادی کی خبریں، ترجمان نے تردید کردی

بلاول بھٹو زرداری کی منگنی اور شادی کی خبریں، ترجمان نے تردید کردی، مرتضیٰ وہاب نے منگنی اور شادی سے متعلق تمام خبروں کی تردید کردی ہے

کراچی: پاکستان پیپلز پارٹی کے چیئرمین بلاول بھٹو زرداری کی منگنی اور شادی سے متعلق زیرِ گردش خبروں پر ان کے ترجمان اور میئر کراچی مرتضیٰ وہاب کا اہم بیان سامنے آگیا۔

گزشتہ روز مختلف میڈیا رپورٹس میں دعویٰ کیا گیا تھا کہ صدر مملکت آصف علی زرداری اپنے بیٹے بلاول بھٹو زرداری کے رشتے اور شادی کی تاریخ طے کرنے کے لیے یورپی ملک لیختن شٹائن (Liechtenstein) پہنچ گئے ہیں۔

رپورٹس میں ذرائع کے حوالے سے دعویٰ کیا گیا کہ آصف علی زرداری کے ہمراہ خاندان کے دیگر افراد بھی موجود ہیں اور وہ بلاول بھٹو زرداری کی شادی کے حوالے سے اہم معاملات طے کرنے کے لیے لیختن شٹائن گئے ہیں۔

بلاول کی شادی رواں سال ہونے کا دعویٰ

میڈیا رپورٹس میں یہ بھی دعویٰ کیا گیا تھا کہ بلاول بھٹو زرداری کا رشتہ لیختن شٹائن کے دارالحکومت وادوز (Vaduz) سے تعلق رکھنے والی لڑکی سے طے ہونے کا امکان ہے، جبکہ شادی کی تقریب رواں سال کے آخر میں متوقع قرار دی گئی تھی۔

تاہم ان دعوؤں کی کوئی باضابطہ تصدیق سامنے نہیں آئی تھی۔

مرتضیٰ وہاب نے خبروں کو بے بنیاد قرار دے دیا

دوسری جانب میئر کراچی اور چیئرمین پیپلز پارٹی بلاول بھٹو زرداری کے ترجمان مرتضیٰ وہاب نے منگنی اور شادی سے متعلق تمام خبروں کی تردید کردی ہے۔

سماجی رابطے کی ویب سائٹ ایکس پر جاری اپنے بیان میں مرتضیٰ وہاب نے کہا کہ بلاول بھٹو زرداری کی منگنی یا شادی سے متعلق خبریں غلط اور بے بنیاد ہیں۔

اس بیان کے بعد بلاول بھٹو زرداری کی شادی سے متعلق سوشل میڈیا اور میڈیا میں گردش کرنے والی قیاس آرائیوں کی باضابطہ طور پر تردید ہوگئی ہے۔

لیختن شٹائن کیا ہے؟

لیختن شٹائن مغربی یورپ کا ایک چھوٹا خودمختار ملک ہے جو سوئٹزرلینڈ اور آسٹریا کے درمیان واقع ہے۔ اس کا دارالحکومت وادوز ہے۔

فی الحال بلاول بھٹو زرداری کی منگنی یا شادی سے متعلق کسی باضابطہ اعلان کے بجائے ان کے ترجمان کی جانب سے ان خبروں کو غلط اور بے بنیاد قرار دیا گیا ہے۔

The news story regarding Chairman Bilawal Bhutto Zardari’s engagement or wedding is incorrect and unfounded
— Murtaza Wahab Siddiqui (@murtazawahab1) August 29, 2026