کرک میں پولیس موبائل پر آئی ای ڈی حملہ، ایک اہلکار شہید، 6 زخمی

کرک پولیس موبائل آئی ای ڈی حملہ میں ایک پولیس اہلکار جاں بحق جبکہ 6 اہلکار زخمی ہوگئے۔

پولیس کے مطابق واقعہ تحصیل بانڈہ داؤد شاہ کے پہاڑی علاقے غول بانڈہ بہادر خیل کے قریب پیش آیا۔

پولیس ترجمان کے مطابق پولیس موبائل وین سر درگہ کی جانب جارہی تھی کہ اسے آئی ای ڈی دھماکے کے ذریعے نشانہ بنایا گیا۔ دھماکا اس وقت ہوا جب موبائل وین میں پولیس اہلکار موجود تھے۔

دھماکے کے نتیجے میں وین میں سوار 7 پولیس اہلکار زخمی ہوئے۔ زخمیوں میں واجد، سید شاہ، نورشلی، عمران، شمیم، گوہر اور یاسین شامل تھے۔

زخمی اہلکاروں کو فوری طور پر طبی امداد کے لیے اسپتال منتقل کیا گیا، تاہم واجد زخموں کی تاب نہ لاتے ہوئے دم توڑ گئے۔ پولیس کے مطابق شہید اہلکار کا تعلق علاقے گڈی خیل سے تھا۔

واقعے کے فوراً بعد پولیس اور سیکیورٹی اداروں نے جائے وقوعہ اور گردونواح کو گھیرے میں لے لیا۔ سیکیورٹی اہلکاروں نے دھماکے کے مقام سے شواہد اکٹھے کرنا شروع کردیے ہیں۔

پولیس کے مطابق حملے میں ملوث عناصر کی تلاش کے لیے کارروائی جاری ہے، جبکہ واقعے کے محرکات اور دھماکے کی نوعیت سے متعلق مزید تحقیقات بھی کی جارہی ہیں۔

کرک کے پہاڑی علاقوں میں سیکیورٹی صورتحال کے پیش نظر قانون نافذ کرنے والے اداروں کی جانب سے علاقے میں سرچ اور سیکیورٹی کارروائیاں مزید سخت کیے جانے کا امکان ہے۔

حکام کا کہنا ہے کہ واقعے کے تمام پہلوؤں کا جائزہ لیا جارہا ہے اور شواہد کی بنیاد پر حملے میں ملوث عناصر تک پہنچنے کی کوشش کی جارہی ہے۔

دوسری جانب زخمی پولیس اہلکاروں کو طبی سہولیات فراہم کی جارہی ہیں۔ واقعے کے بعد علاقے میں سیکیورٹی بڑھا دی گئی ہے۔