پاکستان تحریک انصاف کا لکی مروت سے صوابی تک لانگ مارچ کا اعلان، پہلامرحلہ شروع

پی ٹی آئی لانگ مارچ کے پہلے مرحلے کا آغاز آج لکی مروت سے ہوگا

پاکستان تحریک انصاف نے لکی مروت سے صوابی تک مارچ کے پہلے مرحلے کا شیڈول جاری کردیا ہے، تاہم فی الحال اسلام آباد جانے کا کوئی منصوبہ سامنے نہیں آیا۔

خیبرپختونخوا کے وزیراعلیٰ سہیل آفریدی کی جانب سے جاری اعلان کے مطابق لانگ مارچ کا پہلا مرحلہ آج 4 اکتوبر کو سہ پہر ایک بجے لکی مروت کے گنڈی چوک سے شروع ہوگا۔ اس موقع پر صوبے کے مختلف اضلاع سے آنے والے قافلے مارچ میں شریک ہوں گے۔

اعلان کے مطابق ٹانک، ڈیرہ اسماعیل خان، جنوبی وزیرستان، شمالی وزیرستان، بنوں اور لکی مروت کے قافلے گنڈی چوک لکی مروت میں جمع ہوں گے اور وہاں سے لانگ مارچ کا آغاز کیا جائے گا۔ پہلے روز مارچ کے بعد رات کا قیام کرک کے قریب ہوگا۔

5 اکتوبر کا شیڈول

پیر 5 اکتوبر کو دوپہر 12 بجے کرک کے عوام بھی لانگ مارچ میں شامل ہوں گے۔ اعلان کے مطابق قافلہ ساڑھے 12 بجے کرک سے روانہ ہوگا اور رات کوہاٹ کے قریب قیام کرے گا۔

اس مرحلے میں مقامی سطح پر مزید کارکنوں اور شہریوں کی شرکت متوقع ہے، جس کے بعد قافلہ اگلے مقام کی جانب روانہ ہوگا۔

6 اکتوبر کو کوہاٹ سے روانگی

منگل 6 اکتوبر کو دوپہر 12 بجے کوہاٹ، ہنگو، کرم اور اورکزئی کے قافلے لانگ مارچ کا حصہ بنیں گے۔

شیڈول کے مطابق کوہاٹ سے قافلہ پشاور کی جانب روانہ ہوگا اور رات پشاور کے متنی کے قریب قیام کیا جائے گا۔

7 اکتوبر کو پشاور سے مارچ

بدھ 7 اکتوبر کو پشاور کے بڈھ بیر سے دوپہر ساڑھے 12 بجے قافلہ روانہ ہوگا۔ اعلان کے مطابق خیبر ضلع کے عوام بھی اس موقع پر لانگ مارچ میں شریک ہوں گے۔

پشاور کے دیگر علاقوں سے آنے والے قافلے کوہاٹ روڈ پل اور موٹروے ٹول پلازہ کے مقامات پر مارچ میں شامل ہوں گے۔ اس روز رات کا قیام چارسدہ انٹرچینج کے قریب رکھا گیا ہے۔

8 اکتوبر کو خیرآباد میں اجتماع

جمعرات 8 اکتوبر کو دوپہر ساڑھے 12 بجے قافلہ چارسدہ انٹرچینج سے روانہ ہوگا۔ اس موقع پر چارسدہ اور مہمند کے قافلے بھی لانگ مارچ کا حصہ بنیں گے۔

اعلان کے مطابق 8 اکتوبر کو خیبرپختونخوا بھر سے عوام خیرآباد میں جمع ہوں گے اور وہیں رات قیام کیا جائے گا۔

تحریک انصاف کی جانب سے بتایا گیا ہے کہ لانگ مارچ کے اگلے مرحلے کا اعلان خیرآباد میں کیا جائے گا۔ اس طرح پہلے مرحلے میں مارچ کا روٹ لکی مروت سے شروع ہوکر کرک، کوہاٹ، پشاور اور چارسدہ سے گزرتے ہوئے خیرآباد تک پہنچے گا۔

تحریک انصاف کی جانب سے جاری کردہ موجودہ شیڈول میں لکی مروت سے خیرآباد تک مارچ کا پروگرام دیا گیا ہے، جبکہ اسلام آباد جانے کے حوالے سے فی الحال کوئی پلان جاری نہیں کیا گیا۔